HOËR PRYSE OM DIE DRAAI
KLEIN kuddes, meer uitvoer en die nadraai van die droogte gaan rooivleispryse in die komende maande drasties laat styg, meen verskeie kenners wat onlangs op geleenthede van die Rooivleisprodusenteorganisasie (RPO) gepraat het.
Prof. Ferdi Meyer, direkteur van die Buro vir Voedsel en Landboubeleid (BFAP), voorspel dat SuidAfrika se status as nettoinvoerder van rooivleis omgekeer sal word deur die verwagte uitvoer van sowat 40 ton keursnitte teen die einde van die jaar na Amerika.
“As rooivleis deur dié mark opgeneem word, voorsien ek dat die plaaslike prys daarvan aansienlik kan styg oor die volgende ses tot sewe maande. Dit kan ook die pryse van speenkalwers en aanteeldiere volgende jaar laat verhoog,” sê Meyer. Hy het in Kimberley gepraat op die NoordKaapse RPOkongres.
Hy sê boere wat hul kuddes deur die droogte kon behou, is in ’n mededingende posisie vir ’n mark waarin vleispryse teen die einde van die jaar gaan styg.
VOERKRALE
Mnr. Nick Serfontein, boer, voerkraalenslagplaaseienaar, het op die RPO se Vrystaatse kongres in Bloemfontein gesê hy verwag in die volgende paar jaar vinniger prysstygings as wat selfs die BFAP voorspel. Hy skryf dit ook aan ’n verwagte groot styging in uitvoer toe, wat beteken die binnelandse tekort aan rooivleis gaan net al hoe groter word.
“Daar was sedert verlede jaar ’n groot styging in die aantal beeste wat in voerkrale staan. Ek vermoed dis mense wat hulle vir uitvoer regmaak,” het hy gesê.
Serfontein sê hy is versigtig om sulke voorspellings te waag, maar hy verwag ’n karkasprys van rondom R44/kg teen einde vanjaar, of selfs hoër, en R46/kg teen einde volgende jaar.
Die speenkalfprys kan vanjaar rondom R25/kg draai en dan rondom R28/kg teen einde volgende jaar, meen hy.
Hy sê hoewel daar reeds ’n groot toename in die vraag na vroulike diere op veilings is, is daar nog daagliks ’n ooraanbod van Cgrade by slagplase.
TEKORTE
Dr. Pieter Prinsloo, ondervoorsitter van die nasionale RPO, het op die organisasie se jaarvergadering op Stellenbosch gewaarsku dat die volle impak van die droogte later vanjaar drasties na vore gaan tree wanneer tekorte aan slagvee erger gaan word. Veral vanaf Julie gaan die vuisvoos verbruiker waarskynlik heelwat meer vir vleis begin betaal.
Hy sê die droogte het ’n kleiner invloed op skape as op beeste gehad.