NAMIBIË STUUR SA BULLE TERUG OOR MALBEESSIEKTE

SUID-AFRIKA se beesbedryf sal dringend moet werk maak van sy sertifisering oor malbeessiekte nadat Namibië invoer tydelik opgeskort het.

Namibië het onlangs die eerste Afrikaland geword wat deur die internasionale dieregesondheidorganisasie (OIE) gesertifiseer is as ’n land met ’n weglaatbare risiko van malbeessiekte (BSE). Nou dring hy aan dat lande wat beeste vir teeldoeleindes daarheen wil uitvoer, ook BSEvry verklaar word.

Invoer is op 7 Junie opgeskort en verlede Maandag heringestel.

Hoewel malbeessiekte nog nie in SuidAfrika gediagnoseer is nie, sê mnr. Gerhard Schutte, bestuurder van die Rooivleisprodusenteorganisasie (RPO), die land moet nou aansoek doen om BSEvrye status.

“Boere het tot nou toe goeie pryse op stoetveilings verdien waar Namibiese kopers kom koop. Ons gaan daardie buitelandse valuta verloor,” sê hy.

Schutte sê teen die huidige wisselkoers kan beesuitvoer ook goeie geld in Eerstewêreldlande verdien. “Ons voer tans uit na 42 lande, maar kan nie na die Eerste Wêreld uitvoer solank ons nie BSEvrye status het nie.”

In Namibië se aanvanklike brief aan SuidAfrika en ander handelsvennote het die ministerie van landbou, water en bosbou alle invoerpermitte opgeskort en gesê geen lewende beeste, beesvleis of ingewande, met die uitsondering van ontbeende beesvleis, mag in die land ingevoer word nie. Ander vee en vleisprodukte mag steeds ingevoer word.

OPLOSSINGS

Die verbod is toe Maandag teruggetrek. Schutte sê die bedryf soek tans na oplossings en Namibië het ’n vraelys na SuidAfrika gestuur waarop die plaaslike bedryf moet antwoord. “As ons daarop gunstige terugvoer kan gee, sal dit hopelik genoeg wees om aan Namibië te bewys dat die besmettingsrisiko genoegsaam beperk is.”

Dr. Pieter Prinsloo, ondervoorsitter van die nasionale RPO, het op die onlangse jaarvergadering van die WesKaapse RPO naby die Paarl gesê sommige bultelers was regtig in die moeilikheid weens die opskorting. “Daar is reeds vragte bulle wat op die grens moes terugdraai en teruggestuur is, of bulle wat reeds verkoop is, maar nie oorgestuur kan word nie.”

Prinsloo sê die Departement van Landbou, Bosbou en Visserye het reeds die protokol vir die BSEvrye status van die OIE gekry, maar kan nog nie aandag gee daaraan nie.

“Ons voer tans uit na 42 lande, maar kan nie na die Eerste Wêreld uitvoer solank ons nie BSE-vrye status het nie.”