NUWE RIGLYNE VIR BEMESTING IN WINGERD
Vir die eerste keer sedert 1994 het ’n handleiding met bemestingsriglyne vir die wynbedryf die lig gesien. ’n Paneel bestaande uit grond-, bemesting- en wingerdboukundiges het saamgewerk om algemeen aanvaarde riglyne vir wingerd in Suid-Afrika in ’n maklik verteerbare formaat – met pragtige kleurfoto’s – saam te vat.
Die boek, Bemestingsriglyne vir die wynbedryf, is deur mnr. Braham Oberholzer, grondkundige by VinPro, saamgestel en deur Winetech en Villa Crop gefinansier.
Volgens mnr. Francois Viljoen, bestuurder van wingerdboukundige dienste by VinPro, het wingerdboukundiges in die laat 1980’s groot meningsverskille oor die bemesting van wingerd gehad. Dit het gelei tot ’n werkgroep waar wingerd-, landbou- en bemestingkundiges hul riglyne vir wingerdbemesting in Suid-Afrika neergepen het. Dié handleiding het in 1994 verskyn en die afgelope twee dekades ’n goeie grondslag vir die bedryf gebied. Danksy nuwe kennis en tegnologie was die tyd egter weer ryp vir nuwe riglyne.
Basiese beginsels oor grondontledings, chemiese regstellings tydens grondvoorbereiding, onderhoudsbemesting, tipes bemesting en toedieningspraktyke en die verwantskap tussen die voedingstofstatus van ’n wingerd en die wyngehalte daarvan word aangeroer.
Die nuwe boek se afdeling oor spoorelemente is maar net een van die hoofstukke wat aangevul is.
Mnr. Dawid Saayman, ’n konsultant wat voorheen vir Distell gewerk het, sê in die 1990’s het kopervoeding vir wingerd nie juis aandag geniet nie omdat daar nie verslae oor kopertekorte bestaan het nie. Die nuwe handleiding bespreek nou norme vir die koperinhoud in blare en stele volledig.
Die boek gee ook omvattende en praktiese raad om grond- en blaarmonsters te neem wat sal verseker dat laboratoriums volledige ontledings kan doen. ’n Interessante afdeling is oor die neem van monsters in klipperige grond. In die Wes-Kaapse wynbedryf kom gruis, klip en skalie algemeen wyd voor. Hoewel sommige laboratoriums nie vir klipfraksie toets nie, of boere dikwels nie die volume groot spoel- of rivierklippe in ’n blok meld nie, kan die voorkoms van klippe ’n beduidende invloed op die kunsmisaanbeveling (die bepaling van die gips-, kalk-, kalium- en fosfaatbemestingsbehoeftes) hê.
Volgens een van die medeskrywers, mnr. Bennie Diedericks van Resalt Agricultural Systems and Strategies, het die basiese bemestingsbeginsels nie verander nie, hoewel daar gereeld nuwe produkte verskyn.
“Wat wél verander het, is die praktyke, toedieningsmetodes en meetmetodes.”
Saayman sê die norme in die boek is “relatief konserwatiewe, maar bewese norme” waaroor al die kenners ná vele besprekings ooreengekom het.
“Dit kan op die oog af verskil van ander lande en bedrywe, maar wingerdboere kan vertroue hê in die norme wat ons daarstel. Ons begin met ’n riglyn – laer is altyd veiliger – en jy kan jou program aanpas na gelang van die werklikheid in die veld. Dís hoe ’n mens die boekie moet hanteer.”