R21 SE HUUR PER JAAR VIR WALLIESE PLAAS
’n Walliese plaas ter waarde van meer as R23 miljoen, met ’n skaapkudde van 500 diere, word aan ’n huurder aangebied wat in die eerste tien jaar net 1 Britse pond (sowat R21,70) per jaar sal betaal.
Die Verenigde Koninkryk se nasionale trust sê ook enige wins wat die huurder op die 344 ha maak, kan hy of sy hou.
Daar is egter ’n belangrike voorwaarde: Enige boer wat die grond huur, moet só boer dat die natuurlewe en landbouproduksie daarop herstel word. Die plaas, Parc Farm, is deel van ’n kosbare, kwesbare landskap, die Great Orme, in Llandudno, Noord-Wallis, wat die trust wil help bewaar.
Dit kyk oor die Ierse See uit, en omvat kalkgrond en plant- en diersoorte wat nêrens anders op aarde voorkom nie. Dié soorte se voortbestaan vereis ’n nuwe manier van boerdery wat in pas met die natuurlike omgewing is.
Die trust het Parc Farm verlede jaar gekoop met die oog op die bewaring van hierdie unieke landskap. Tydens hul geldinsameling het duisende mense tot die koste van £1 miljoen (byna R22 miljoen) bygedra.
“Tensy ons nie ’n baie spesifieke weiprogram volg nie, sal hierdie baie kwesbare habitat nooit herstel nie,” sê mnr. William Greenwood, hoofbestuurder van Great Orme.
Die trust is dus nou op soek na die regte mens om die plaas te huur en wat sal verseker dat die omgewing herstel en die natuurlewe weer floreer.
Dit sal onder meer tradisionele boerderymetodes insluit, soos lang dae waarin die skape oor moeilike, rotsagtige terrein aangekeer moet word.
Die produktiefste weiding op die plaas moet minder bewei word, en dié dele wat minder landbouproduktief is, moet meer bewei word.
Tans is die taaier grasse op die plaas te hoog, wat die habitat vir natuurlewe inperk.
“Ons soek na ’n huurder wat ’n produktiewe plaas as een beskou wat bewaringsvoordele én goeie, gesonde kos produseer,” sê William. —ALANHARMAN