WAT IS DIE ONONTBEERLIKSTE TEGNOLOGIE OP KERRERA?
Die internet. Ek kuier graag op oorsese netwerke en volg blogs oor enige aspek van boerdery, veral saaiboerdery. Ek is ’n groot aanhanger van geenbewerking.
SÓ HET HANDRÉ EL NIÑO GESYSTAP
■ Grondvoorbereiding. Hoewel Handré hoofsaaklik strookbewerking op Kerrera toepas, is hy stelselmatig besig om na geenbewerking oor te skakel. Hy sê met strookbewerking beloop die kilowattvereiste slegs 0,5 kW/ha en die algehele dieselverbruik tot strooptyd 17 liter/ha.
Hy het sy lande teen middel Oktober met 2 liter Roundup Turbo per hektaar en ammoniumsulfaat bespuit en nadat die eerste 15 mm reën geval het strookbewerking op die lande toegepas. Die eerste mielies is gedurende die eerste week van November geplant. Normaalweg plant hy al sy lande binne 2-3 weke, maar weens die droogte het hy dit hierdie seisoen tot ’n week voor Kersfees versprei.
■ Bemesting. Die Omnia-mengsel 7:15:7 (29) is met die planter teen 250 kg/ha (droëland) en 300 kg/ha (besproeiing) gebandplaas. Ná opkoms is Solical N (33) teen 150 kg/ha uitgestrooi en tussen die vyf- en sesblaargroeistadium is 5:0:1(40)+S teen 250 kg/ha op die droëlande uitgestrooi en 300 kg/ha vir die lande onder besproeiing. Die algehele makroplantvoeding vir die seisoen vir die lande wat besproei is, het 200 kg stikstof, 45 kg fosfor en 44 kg kalium per hektaar beloop en op die droëland 140 kg stikstof, 30 kg fosfor en 33 kg kalium per hektaar.
■ Onkruidbestryding. Handré sê uintjies in ’n land kan selfs meer skade as ’n droogte aanrig. Weens die droogte was van die onkruiddoder wat vóór en ná planttyd toegedien was, nie baie doeltreffend nie. Sy spuitprogram teen onkruid is normaalweg die Synpack van Syngenta, maar hierdie seisoen het hy ’n effens goedkoper program vir die vooropkomsbestryding van onkruid gevolg. Dit het bestaan uit Supranex (1,5 liter/ha), Mesoflex (200 ml/ha) en Guardian (500 ml/ha). Al die lande is vroeg in die seisoen met Roundup skoongemaak. ’n Tweede bespuiting net ná opkoms is met Roundup Powermax (2 liter/ha), Harness (1 liter/ha) en Mesoflex (200 ml/ha) gedoen.
Om blaarsiektes te bekamp, het hy die eerste bespuiting met Abacus of Amistar op die vyf- tot agtblaar-groeistadium gedoen en dit 28 dae later net vóór bestuiwing opgevolg.
■ Pakket. Handré se mieliepakket het bestaan uit die Monsanto-kultivars DKC73-74BR op 320 ha, DKC73-76R op 55 ha en DKC71-44B op 15 ha, die Pioneerkultivar Phb 33H54BR op 100 ha en die kultivar KKS 8214 R van Klein Karoo Saad Bemarking op 15 ha. Omdat die Phb 33H54BR kleiner blare het, het dit vanjaar se droogte in sekere lande beter deurstaan as die Monsanto-kultivars wat breë blare het en tydens die intense hitte, selfs onder besproeiing, sonbrand opgedoen het.
Handré meen daar is nie ’n enkele kultivar wat op al die lande gaan deug nie. “Jy moet ’n goeie kennis van jou grond hê. Op marginale lande het ek gevind dat DKC7374BR en DKC73-76R beter gepresteer het, terwyl Phb 33H54BR weer beter op hoëpotensiaallande gepresteer het.’’