AARTAPPELS: MOER-REUS BETREE TAFEL-MARK
Wesgro en RSA Markagente span kragte saam om ’n aartappel-handelsmerk in die informele mark te vestig.
OP 26 Mei vanjaar het Wesgro, voorheen die Wes-Vrystaat Aartappelmoerkwekers, sy nuwe handelsmerk vir tafel-aartappels op die RSA Markagente se vloer op Johannesburgse varsproduk- temark begin.
In hierdie strategiese vennootskap gaan Wesgro met vyf verskillende verpakkings, naamlik ’n1kg,2kg,4kg,7kgen10kg verpakking, hoofsaaklik sy aandag op die informele mark deur spaza-winkels, smouse en onafhanklike verkopers vestig.
Volgens mnr. Gerhard Posthumus, die besturende direkteur van Wesgro, het hulle navorsing getoon dat tot 70% van hul toekomstige verkope in die informele segment van die mark sal plaasvind.
“In hierdie lig is RSA Markagente ’n goeie vennoot, aangesien hy dieselfde aptyt het vir uitbreiding en ontwikkeling van markte in die ganse Afrika as Wesgro,” verduidelik Posthumus.
Volgens mnr. Jaco Oosthuizen, besturende direkteur van die RSA Markagente-groep, is hierdie vennootskap die regte stap vir RSA om sy leierskapposisie in die varsproduktemark uit te bou. “Ons soek voortdurend innoverende produsente wat goeie produkte kan lewer.
“Wesgro se progressiewe ingesteldheid om aartappels as meer as net ’n kommoditeit te vestig in die gedagtes van die verbruiker, weerspieël ons eie visie,” verduidelik Oosthuizen.
Wesgro beraam dat hulle tot 65% van alle moerproduksie in die land verteenwoordig. Aanvanklik sal sy eie tafel-aartappels slegs op die Johannesburg varsproduktemark verkoop word, maar sal mettertyd ook na Pretoria en Durban uitbrei.
–