‘Jong boere moet verskil maak’
JONG boere moet selfondersoek doen en maniere vind om die hindernisse en pessimisme in die landbou in oplossings en iets opbouends te verander, sê mnr. Jacques Beukes (35), die WesKaap se aanspraakmaker op die Jongboer van die Jaar-titel.
“Die verskil begin by jou,” het Beukes, ’n tafeldruifboer van die plaas Modderdrift in die Hexriviervallei, gesê.
“Sien die geleenthede raak – veral wat swart ekonomiese bemagtiging bring – en werk saam
met die Regering om hierdie geleenthede plaas toe te bring,” het hy gesê kort nadat hy naby Durbanville as die Wes-Kaapse wenner aangewys is.
Beukes boer al tien jaar lank op Modderdrift. Sy broer, Eugene, is ook by die boerdery betrokke.
Hy beskou dit as ’n voorreg om by ’n gesinsonderneming betrokke te wees.
“Ons vergeet dikwels die waarde van ’n familiebesigheid. Die Afrikaner is geneig om maklik sy eie rigting te wil inslaan, maar ons moet begin saamstaan. Ek sê dankie vir my broer, want ons is dieselfde. As ek nie daar is nie, is hy daar, en andersom. Ons is ook dankbaar teenoor ons pa, Pieter, wat die hoekstene gelê het en vir ons die geleentheid gegee het om te kom boer.”
Beukes is ook Agri Wes-Kaap se streekverteenwoordiger, ’n direkteur van die Hexriviervallei se Tafeldruifassosiasie en die voorsitter van die munisipaliteit Breedevallei se produsenteforum.
Volgens beoordelaars was vanjaar se kompetisie baie sterk.
“Daar was net ’n paar punte verskil tussen die finaliste,” het mnr. Kosie Loubser, wat die graan- en vee-afdeling beoordeel het, gesê.
Mnr. Cornie Swart, voorsitter van Agri Wes-Kaap, sê al hoe meer jong mense raak by die landbou betrokke. “Dit is fantasties. Ons leef in tye met heelwat slegte dinge, maar ek vra die jong boere van die Wes-Kaap om ’n bietjie die politieke ding te los en eerder te fokus met dit waarmee hulle besig is, want hulle doen dit baie, baie goed. Tussen al die chaos is daar geleenthede en daar ís ’n toekoms in die landbou.”
–