WEER MAAK PLEK VIR WISSELKOERS
MET oestyd in volle swang het die weer opsy geskuif as hoofdrywer van prysbewegings op die SuidAfrikaanse mieliemark. Die wisselvallige rand en die Amerikaanse Chicagobeurs voer nou weer die botoon.
’n Ietwat sterker rand teenoor die Amerikaanse dollar het plaaslike mieliepryse die laaste ruk onder druk geplaas. In Amerika het sy departement van landbou die aanvanklike droogtevrese daar besweer, wat op sy beurt die Chicagopryse onder druk geplaas het.
Amerikaanse boere se mielieaanplantings is deur droër weer aangehelp en basies afgehandel, met ’n driekwart in goeie tot uitstekende toestand, sê Graan SA in sy daaglikse markverslag.
Mieliepryse op Safex handhaaf steeds rekordvlakke vanweë die droogte, laat aanplantings en laat ryp in talle gebiede.
Teen middel verlede week het die prys van wit mielies vir lewering in Julie bokant R4 900/ton verhandel. Die soortgelyke geelmieliekontrak het net meer as R3 800 per ton gekos.
Mnr. Wandile Sihlobo, hoof van ekonomiese en landbouinligting by die landbousakekamer Agbiz, meen die nuwe sleuteldrywers kan die plaaslike mieliepryse op kort termyn sywaarts laat beweeg.
Graan SA se opnames wys dat boere in Mpumalanga al sowat 60% klaar geoes het. In die OosVrystaat lyk dit of sowat ’n vyfde van die oeste in dié streek reeds afgehaal is.