REKORDPRYS BY MOORREESBURG BEHAAL
’n Rekordprys van R60 600/ha is vir ’n koringplaas in die omgewing van Moorreesburg betaal.
Mnr. Willie van Rensburg, afslaer en afdelingsbestuurder van sakeontwikkeling by BKBeiendomme, sê die plaas Langrug, wat 514 ha groot is, is in Maart vanjaar per tender teen R31,2 miljoen verkoop.
Volgens Van Rensburg is die plaas een van die kleiner eenhede in die omgewing.
“Die eiendom is ’n goed bestuurde koringplaas met ’n uitstekende ligging.”
Die plaas is 7 km buite Moorreesburg. Volgens Van Rensburg is daar goeie rotasie van gewasse en genoeg water, wat uit die Voëlvleidam kom.
Alle lande is droëlande. Die plaas het ook gehalteomheining en ’n aantal strukture.
Van Rensburg sê die gebied is gesog onder graanboere omdat die reënval en grond baie geskik is vir graanboerdery. Toe die plaas in die mark kom, was daar baie belangstelling.
“Die bure en ander boere in die omgewing het belang gestel, maar daar was ook belangstelling van buite, ook uit die noorde van die land.”
Die Swartlandse plaas is uiteindelik deur ’n buurman gekoop. Van Rensburg sê die plaas is per tender verkoop omdat dit ’n meer vertroulike proses is, wat die verkoper verkies het.
Plaaspryse in die omgewing het in die laaste paar jaar sterk gegroei en daar is tans min plase op die mark.
“Groot boere raak ál groter, ter wille van skaalekonomie, en is altyd na goeie saaigrond op soek.
“Boere wend hulle al meer tot kontantgewasse, veral in ’n stabiele omgewing. Minimumbewerking lei daartoe dat vog in die grond beter bewaar word, wat groei en vestiging van graangewasse bevorder.”
Van Rensburg sê verlede jaar en tot dusver vanjaar is dit droog in die Swartland.
Hy verwag egter nie dat dit gaan lei tot meer plase wat in die mark kom nie.
Boere in die streek diversifiseer en hul boerderye bestaan uit verskeie vertakkings, soos skape, vleisbeeste, melkerye en wingerde.
“Hoewel al die vertakkings van reën afhanklik is, is die risiko tog versprei.” – CARIEN KRUGER