BROUERY MOET SA GARS KOOP
DIE Mededingingstribunaal het die samesmelting van Anheuser-Busch InBev en SABMiller goedgekeur, onderhewig aan voorwaardes wat onder meer Suid-Afrikaanse garsprodusente moet beskerm.
Die samesmelting tussen Anheuser-Busch InBev en SABMiller skep ’n megamaatskappy wat elke derde bier wat in die wêreld gedrink word, sal verkoop.
Graan SA het gevrees die transaksie kan ’n gevoelige slag vir Suid-Afrika se opkomende garsbedryf wees. Talle opkomende boere is geheel en al van dié gewas afhanklik.
Die tribunaal het sy besluit kort voor druktyd op 30 Junie bekend gemaak. Die voorwaardes vir die goedkeuring is aangepas ná voorleggings tydens ’n verhoor die vorige week.
Mnr. Jannie de Villiers, uitvoerende hoof van Graan SA, het by dié verhoor gesê boere is veral bekommerd dat die nuwe maatskappy eerder goedkoper gars uit die buiteland gaan invoer pleks van om dit uitsluitlik in Suid-Afrika te koop.
SAB is tans die enigste aankoper van moutgars in Suid-Afrika. Die plaaslike moutgarsbedryf, wat verlede jaar meer as 300 000 ton gars opgelewer het, is in werklikheid ’n monopoliemark. Enige klein aanpassing
deur die koper kan die stand van die hele bedryf verander.
De Villiers het gesê dit is welbekend dat Anheuser-Busch InBev verkies om vir sy eie moutgarsproduksie te sorg en toegang tot buitelandse markte het wat “goed gestruktureerd” is.
OOREENKOMS
“Gegewe die struktuur van die plaaslike mark, met net een koper, het SAB en Graan SA ’n model ontwikkel wat langertermyn-stabiliteit vir die produksie van gars in Suid-Afrika verseker,” het De Villiers gesê.
Hy het gesê SAB het “betekenisvolle bedrae” in die plaaslike vermoutingsvermoë belê, en gewaarsku dat as hierdie model verander, kan dit die garsbedryf beduidend destabiliseer. Die voorwaardes wat die tribunaal nou gestel het, bepaal onder meer hoe die saamgesmelte maatskappy steeds sy verhouding van plaaslike garsaankope in Suid-Afrika moet handhaaf. Die tribunaal het ook beslis dat die bepalings en voorwaardes van SABMiller se bestaande ooreenkomste met verskaffers nagekom moet word.
De Villiers kon nie teen druktyd vir kommentaar op die voorwaardes bereik word nie.
Anheuser-Busch InBev is reeds verreweg die grootste moutgarsverwerker ter wêreld en vervaardig jaarliks sowat 2 miljoen ton mout, teenoor SAB Miller se 750 000 ton.
—