‘PRYS GAAN JULLE NIE RED’
PRODUSENTE moet ophou dink dat prys hulle gaan deurdra en eerder aandag gee aan hoe om meer uit die verbruikersrand te kry en tegnologie in te span.
Dít was mnr. Ernst Janovsky (foto), hoof van Absa-Agribesigheid se sentrum vir uitnemendheid, se boodskap aan pluimveeprodusente by die AVI Africa-pluimveekonferensie.
Hy het gesê pryse vir landboukommoditeite gaan in die volgende 10 tot 20 jaar in dollarwaarde sywaarts beweeg, tensy iets spesifiek gebeur wat ’n prysbeweging veroorsaak.
“In my leeftyd het pryse net twee keer beweeg. As jul prys in die volgende 30 jaar sywaarts gaan beweeg, hoe gaan julle dit oorleef? Dit gaan oor die verhoging van jul produktiwiteit, nie oor die prys nie. Julle het geen beheer oor die prys nie.”
Janovsky het gewaarsku Suid-Afrika en die wêreld se ekonomieë groei nie en dit beteken verbruikers het minder besteebare geld.
Beter reën in die komende somer kan vir pluimveeprodusente verligting in voerkoste bring.
KYK WYER
Janovsky het egter gesê hul aandag is te veel inwaarts gerig. Danksy uitvoer het beesvleispryse gestyg hoewel aansienlik meer diere geslag is.
“Julle moet oor die wêreldmark begin dink. Dit gaan daaroor om buite Suid-Afrika te kyk. Julle moet dink oor hoe julle dollars gaan verdien. Die mark bestaan wel.”
Hy was krities oor die Suid-Afrikaanse Pluimveevereniging se hofsaak om te keer dat die beoogde pekelwaterregulasies in werking gestel word en om die regulasies te laat hersien.
Dit dui volgens hom ook op ’n te groot inwaartse fokus.
TEGNOLOGIE
Janovsky sê tegnologie gaan groot veranderinge in die landbou meebring.
Vir verbruikers gaan dit al hoe meer oor die storie agter ’n produk en hul hele ervaring daarvan. Tegnologie maak verpersoonlikte produkte moontlik.
“’n Mens kan vandag reeds ’n steak op ’n 3D-drukker druk en die smaak daarvan verander. Supermarkte gaan na verwagting oor 50 jaar baie kleiner wees en die verpersoonlikte ervaring gaan terugkeer.
“Dit is die eerste keer dat die produsente die geleentheid het om die verbruiker ‘terug te neem’. Die vraag is: Wat gaan júlle doen om die verbruiker terug te neem? As jy die verbruiker besit, kan jy meer van die verbruikersrand in jou sak kry.”