NKWINTI KELDER ONDERHANDELINGE OOR HUURARBEIDERS
ONDERHANDELINGE tussen die Regering en ’n organisasie wat huurarbeiders met grondeise verteenwoordig, het op ’n breekspul uitgeloop.
Me. Laurel Oettle, direkteur van die Association for Rural Advancement (Afra), het by navraag gesê dit was weens “eensydige optrede” deur mnr. Gugile Nkwinti, Minister van Landelike Ontwikkeling en Grondhervorming.
Afra tree namens sowat 20 000 huurarbeiders op wat al 15 jaar wag dat hul grond eise afgehandel moet word. Die organisasie is in ’n uitgerekte hofstryd met die departement daaroor gewikkel. Regter Seena Yacoob van die Grondeisehof in Randburg het op 24 Mei beslis die twee partye moet ter goeder trou voor 30 Junie ’n memorandum van verstandhouding onderhandel.
RAADPLEGING
Volgens Oettle het die partye se onderhandelings goed begin, maar kon hulle weens die minister se optrede nie ’n ooreenkoms
bereik nie.
Hy het op 10 Junie, sonder om Afra te raadpleeg, in ’n koerantadvertensie aangekondig dat hy ’n nasionale forum van nieregeringsorganisasies wil stig om ’n program vir huurarbeiders te bepaal.
Oettle sê dit was ondanks die hofbevel wat bepaal het dat die te stigte forum een van die sake was waaroor onderhandel moes word. Sy sê die departement het boonop ’n openbare kennisgewing uitgereik waarin hy huurarbeiders met eise vra om na vore te kom en dit teen 30 Junie te laat staaf.
“Daardie kommunikasie het nie net verwarring by grondeienaars en huurarbeiders veroorsaak nie, maar ook onnodige spanning op plase. Die minister het tot dusver slegs herhaal dat hy in die regmatigheid van sy optrede glo en het glad nie op Afra en sy regsverteenwoordigers se substantiewe besware gereageer nie.”
Oettle sê Afra het geen keuse as om die saak weer op die rol van die Grondeisehof te plaas nie om so gou moontlik aangehoor te word. –