TARIEF OP HOENDER UIT VSA ‘DALK LAER’
’N Moontlike hersiening van die vyftien jaar oue teenstortingstariewe op Amerikaanse hoenderstukke kan tot laer of selfs geen tariewe lei.
Dit is die mening van mnr. Donald MacKay, direkteur van XA International Trade Advisors.
Volgens hom sal die Kommissie vir Internasionale Handelsadministrasie (Itac) na verwagting ’n ander metode vir die berekening van storting gebruik.
Teenstortingstariewe mag volgens die reëls van die Wêreldhandelsorganisasie (WHO) net vyf jaar duur, waarna ’n land se plaaslike bedryf om ’n hersiening aansoek kan doen.
Suid-Afrika se teenstortingstarief op Amerikaanse hoenderstukke aan die been is al twee keer hersien en verleng.
Die huidige tarief van R9,40/ kg verval op 4 April aanstaande jaar, tensy die plaaslike pluimveebedryf, soos verwag word, teen 4 Oktober vanjaar om die hersiening aansoek sal doen. MacKay sê in dié geval sal die tariewe vir 18 maande ingestel word terwyl die hersieningsondersoek aan die gang is.
KOSTEBEREKENING
Hy sê Itac het verlede jaar ’n ander metode van berekening in ’n ondersoek oor storting van hoender uit die Europese Unie (EU) gebruik. Dit volg op ’n WHO-besluit in ’n saak tussen Amerika en China, wat Amerika gewen het.
Eenvoudig gestel, gaan dit oor hoe die koste van produksie bereken word, sê MacKay.
Die een metode behels die eweredige toedeling van koste tussen die stukke van die hoender, terwyl die ander metode, wat Amerika voorstaan, behels dat meer koste toegewys word aan stukke waarvoor hoër pryse behaal kan word.
In Amerika geld dit byvoorbeeld vir borsvleis. MacKay sê dit sal tot Amerikaanse hoenderboere se voordeel wees om aan die verwagte hersieningsaansoek deel te neem.
As die teenstortingstarief verlaag word, sal dit vir die Amerikaners makliker wees om só hoender na Suid-Afrika uit te voer as kragtens die rabat op die tarief wat onderhandel is as deel van die hernuwing van die Amerikaanse wet op groei en geleenthede in Afrika (Agoa).
Sedert Desember verlede jaar tot April vanjaar is sowat 10 400 ton Amerikaanse hoenderstukke aan die been kragtens die rabat ingevoer.
“Dis duidelik die Amerikaners wil graag die Amerikaanse produk na Suid-Afrika bring,” sê MacKay. –