Nuwe Chinees trek aandag
Vir vastrapplek in SuidAfrika se motormark moet jy slim wees, jou terrein kies én ’n stewige produk hê. Die Chinese motorvervaardigers is al lank in Suid-Afrika, maar ’n gebrek aan sinvolle bemarking en hoëgehaltevoertuie het hulle gepootjie. Sedert die bekendstelling van bakkies, soos die Foton Tunland, het menings egter begin verander. Ál meer Suid-Afrikaners kies nou ’n bekostigbare bakkie wat byna dieselfde luuksheid bied as sy bekender, duurder mededingers.
Die JMC Vigus is een van dié nuwe toetreders wat luuks genoeg is. Die vervaardiger beweer ook hy’s taai, ’n bewering wat ná ’n week se bestuur op plaaspaaie nie onwaar gelyk het nie.
EERSTE INDRUKKE
Die Vigus lýk goed, so effens na die Mazda BT-50 van voor en die Ford Ranger van agter, sonder om hulle te veel te na-aap. Die bakkie trek aandag – ek het heelwat vrae daaroor gekry.
Nes al die ander nuwe bakkies is die Vigus ’n groot bakkie (1 815 mm hoog, 5 325 mm lank van neus tot stert, en 1 905 mm breed van kantspieël tot kantspieël). Die Vigus 4x4 MT SLX wat ek getoets het, het ook ’n skaflike minimum grondvryhoogte van 225 mm (die 4x2-weergawes se grondvryhoogte is 181 mm).
BINNERUIM
Die bakkie het ’n ruim kajuit met ’n ergonomiese uitleg wat al die beheerknoppies netjies binne die bestuurder se bereik plaas.
Die multifunksiestuurwiel, met knoppies vir volume- en telefoonbeheer, beteken jy kan jou oë op die stuurwiel hou.
’n Aanboord-rekenaar is deesdae amper standaardtoerusting by nuwe bakkies, maar die Vigus s’n het my beïndruk. Naas die gewone radio-en-CD-spelerfunksies, het dit ook ’n DVD-stelsel.
’n Navigasiestelsel ontbreek en die afwesigheid van ’n Bluetooth-stelsel is werklik ’n nadeel. Die 16,5 cm-skerm is groot en duidelik genoeg om inligting vinnig in te neem en is netjies in die voorste paneel ingebou.
’n Voordeel van die groot kajuit is die lang beenruimte vir die passasiers op die agterste sitplek. Daar is ook genoeg kopruimte.
ENJIN EN RATKAS
Met kraglewering van 90 kW teen 3 800 r/min. en wringkrag van 290 N.m van 1 600 r/min. tot 1 750 r/min., laat die 2,4 jou nie juis regop sit nie.
Die nuwe 2,4
lewer 110 kW en 400 N.m van 1 600 r/min. tot 2 000 r/ min. In hierdie opsig vergelyk die Vigus met ’n vorige geslag Japannese bakkies.
Daar is beslis traagheid in die laer revolusies. In die kragband (die kurwe tussen die maksimum wringkrag en die maksimum kilowatt) trek die bakkie egter soos ’n fris vul wat huiswaarts keer.
Brandstofverbruik was min of meer by 9,1 km, wat nie sleg is vir so ’n groot voertuig nie.
ALGEMENE RYGEMAK
Een voordeel is die gemak waarmee tussen 4x2, 4x4-hoog (4H) en 4x4-laag gewissel word. ’n Knop tussen die bestuurder en passasiersitplekke word net gedraai om die verstelling te maak.
Op teerpaaie is die Vigus stewig, maar hy is geneig om weens sy stywe vering op grondpaaie te oorstuur. Sodra die 4H-verstelling gemaak word, sit die Vigus weer stewig op die (grond)pad.
MEDEDINGING
Aangesien die Vigus se mededingers, soos die Toyota Hilux, Ford Ranger en Isuzu KB, hulself al as betroubare kalante bewys het wat al jare lank deel is van die Suid-Afrikaanse bakkiemark, moet die Vigus homself nog bewys. Onthou, 15 jaar gelede het softy, mense neergekyk op Koreaanse voertuie, en kyk hoe suksesvol is hulle deesdae.
Ons oupas was skepties oor Japannese bakkies in die vroeë 1970’s. Ja, selfs oor die Hilux.
Tans is die Vigus se grootste voordeel sy bekostigbaarheid gemeet teen sy mededingers. Kom ons gee hom ’n kans.
SPESIFIKASIES
Sesganghandratkas ■ Maksimum krag: 90 kW
teen 3 800 r/min. ■ Maksimum wringkrag: 290 N.m van 1 600 r/min. tot 1 750 r/min. ■ Vering: Dubbelmikvering
voor en bladvere agter ■ Wiele: 235/70R16-allooi ■ Topspoed: 160 km/h ■ Brandstofverbruik:
9,1 liter/100 km ■ Remme: Geventileerde skyfremme voor, trommelremme agter ■ Diensplan: 5 jaar of 60 000 km met versienings elke 10 000 km, met ’n 3-jaar/ 100 000 km-waarborg. ■