Opkomende boere se drome aan skerwe

DIE huidige grondhervormingsproses vernietig die lewens van die begunstigdes daarvan en die Regering sal dié proses behoorlik moet doen óf dit laat vaar.

Dít is die African Farmers’ Association of South Africa (Afasa) se woorde aan die Regering nadat dié organisasie verskeie stories van boere moes aanhoor wat op moedverloor se vlakte sit.

Mnr. Aggrey Mahanjana, sekretaris-generaal van Afasa, vertel van ’n Oos-Kaapse boer aan wie ’n melkplaas sowat ses jaar gelede deur die Departement van Landelike Ontwikkeling en Grondhervorming toegewys is. Dié boer het sy werk gelos om te boer. Hy het gehoop dat hy ondersteuning van die herkapitaliseringsprogram van die departement sou

kry, maar dit het nie gebeur nie. Intussen is die plaas steeds sonder melkbeeste, melkerytoerusting en masjinerie. Sy pleidooie om hulp aan die Ministerie van Landelike Ontwikkeling en Grondhervorming het niks opgelewer nie.

“Boere wat plase deur die grondhervormingsproses gekry het, is nou slegter daaraan toe as tevore. Hul drome is aan skerwe en hul toekoms onseker,” sê Mahanjana. Talle van die boere het onproduktiewe plase gekry wat nou gevandaliseer word.

“Sommige van die mense het hul gerieflike lewens, toe hulle as onderwysers, verpleegsters en polisielede gewerk het, prysgegee. Hulle het ’n droom gehad om hul lewens as boere te verbeter en ’n bydrae tot Suid-Afrika se voedselsekerheid, ekonomie en werkskepping te lewer.

“Hulle is nou in die steek gelaat deur ’n korrupte en onbevoegde stelsel en moet self aansukkel. Hul lewens is vernietig,” sê Mahanjana. Afasa meen die staat moet ’n nuwe benadering tot grondhervorming kry. Hy stel voor dat die Regering die toepassing van die grondhervormingsproses in elk van die nege provinsies aan private maatskappye moet uitkontrakteer.