VERBY DIE HORISON
Dit was iets wat René Stubbs, visionêre geenbewerkingsboer van Karkloof, daar in die prentjiemooi KwaZulu-Natalse Middeland, onlangs gesê het wat my aan die dink gesit het. Hy is deesdae voorsitter van Dairy Day, ’n nuwe boerekoöperasie wat deur die gesamentlike bemarking en verwerking van melk groter bedingingsmag vir boere wil bewerkstellig. “Uiteraard wil ons geld maak met ons boerderye én met Dairy Day,” het René in ’n onlangse onderhoud gesê. “Maar as ons doel bloot was om op kort termyn ’n hoër prys vir ons melk te kry, dink ek nie sou ons die onderneming aan die gang kon kry nie.”
Daar is iets groots en optimisties aan ’n visie wat bereid is om pyn op kort termyn te verduur ten einde op die langer duur beter af te wees. Soos die 18de eeuse Ierse politikus en skrywer van die geliefde Gullivers Travels, Jonathan Swift, op ’n kol opgemerk het: “Visie is die kuns om die onsigbare te sien.”
Die vaste geloof dat ’n beter toekoms moontlik is, al lyk dinge tans hoe sleg. Soos die sakedenker Werner Erhard dit gestel het: “Skep jou toekoms uit jou toekoms, nie jou verlede nie.”
Dié vermoë om verby die horison te kan sien, is die een uitstaande kenmerk wat ware visionêre mense van ons gewone ploeteraars onderskei. Geen wonder nie Henry Ford het droogweg opgemerk as hy gewone mense sou gevra het wat hulle wou hê, sou hulle op ’n vinniger perdekar aangedring het pleks van ’n Ford T!
Hierdie versiende eienskap ontbreek heeltemal by Suid-Afrika se politieke leiers. Werklike groot geeste, soos Jan Smuts en Nelson Mandela, maak hul verskyning in die kleingeestige wêreld van politiek net elke 50 jaar of so, indien ’n nasie baie gelukkig is. Die res van die tyd probeer politici tussen verkiesings maar net hul snoete so diep as moontlik in die krip kry.
En die private sektor kan sy hande ook nie in onskuld was nie. Vat die hele tameletjie van aardverwarming. Die rede hoekom dit so moeilik is om op te los, is bloot omdat niemand die eerste een wil wees wat sy mededingende voordeel van goedkoop uitbuiting van die aarde prysgee nie. Want hoe verduidelik ’n mens die ekstra uitgawes aan jou aandeelhouers. En, aarde tog, wat van daardie lekker vet prestasiebonus? Die feit dat die aftakeling van natuurlike stelsels op die langer duur sake net gaan duurder maak, word gerieflik afgemaak as die volgende geslag se probleem.
Gelukkig (of miskien ongelukkig) moet boere ’n langertermynperspektief op sake hê. Die droogte het weer bewys dat oorlewing eintlik in die goeie tye gebeur, jare voor enige droogte sy kop uitsteek. Daar is ook ’n groter waardering vir die gratis dienste wat natuurlike stelsels, soos grond, aan boerderye bied en die belangrikheid om hulle te bewaar ten einde só ’n veerkragtigheid te kry wat jou deur die maer tye kan dra. En, vasgevang in seisoenale siklusse, soos die landbou maar is, is daar ook ’n groot besef dat foute jare kan kos om weer reg te stel. Alles goed wat korttermynbesluite op ’n plaas gevaarlik maak.
Dit is ’n werklikheid wat hopelik aan René Stubbs en sy medeboere die unieke vaardighede gaan gee om van Dairy Day die sukses te maak wat dit behoort te wees. — CHRIS BURGESS Media24 Weeklikse Tydskrifte SPESIAAL
BESTEL SÓ Gaan na die aanlynwinkel op Landbou.com en klik op die knoppie wat lees Winkel, of gebruik die internetadres http://winkel.landbou.com/ of bel Johan Terblanche by tel. 021 406 4962.