NAMIBIESE BULLE VREET AANLYN
HAP vir hap kan Kanadese kundiges waarneem hoe bulle in ’n voerstasie in Namibië hulle aan hul voer verlustig, terwyl die inligting deurentyd verwerk word sodat die boere wie se bulle getoets word, uiteindelik die beste bulle uit die bestes vir teeldoeleindes kan behou.
Dit klink futuristies, maar is presies wat ’n projek van twee Namibiese swaers, mnre. Mecki Schneider van Grootfontein en Ebbi Fischer van Hochfeld, behels. Hulle het ’n uiters moderne, outomatiese voerstasie by die Kanadese maatskappy GrowSafe gekoop waarmee hulle meet watter bulle hul voer die beste in vleis omsit sodat net hulle vorentoe vir teeldoeleindes gebruik kan word.
Die voerstasie op Fischer se plaas is pas aan ander boere bekend gestel en Landbouweekblad is deur die twee boere genooi om die geleentheid by te woon. Dit is die eerste voerstasie in sy soort in Afrika. Me. Alison Sundstrum, hoof- uitvoerende beampte van GrowSafe, het al die pad van Kanada gereis om ook daar te wees, asook verskeie Suid-Afrikaanse kundiges, waaronder prof. Norman Maiwashe, hoofbestuurder van die Landbounavorsingsraad se Instituut vir Diereproduksie, prof. Michiel Scholtz, spesialisnavorser van dieselfde instituut, en
dr. Michael Bradfield, hoof van Breedplan Suider-Afrika.
Schneider en Fischer het gewys hoe die voerstasie deur die internet vanuit Kanada gemonitor word. Elke hap voer wat ’n bul vat, word by sy aantekeninge bygewerk deur middel van ’n oorplaatjie met sagteware wat op die rekenaar registreer wanneer hy vreet. Hy word terselfdertyd geweeg.
Uiteindelik weet die boere presies hoe doeltreffend hy voer in vleis omsit. Dit is ’n genetiese eienskap wat na sy nageslag oorgedra kan word.
Landbouweekblad publiseer eersdaags ’n volledige artikel oor die Namibiërs se projek, asook talle kenners se mening oor die voordele daarvan.
–
Landbouweekblad