VEEDIEFSTAL KOS VRYSTAAT MILJARDE
TEELBULLE ter waarde van R450 000 wat gesteel en later geslag in die veld gekry is, vorm deel van ’n ernstige toename in veediefstal in die Vrystaat.
Die aantal veediefstal-voorvalle wat sedert die begin van die jaar by Vrystaat Landbou en VKB se veiligheidslessenaar aangemeld is, toon ’n beduidende styging, asook die aantal diere wat per keer geslag word, sê me. Alani Janeke, woordvoerder.
Navorsing deur mnr. W.A. Lombard van die Universiteit van die Vrystaat wys dat die provinsie regstreekse verliese van R1,5 miljard per jaar weens skaapdiefstal ly. Dit bring nie verliese aan stoet- en teelmateriaal in berekening nie.
Vrystaat Landbou beraam dat skaapdiefstal alleen Vrystaatse boere sowat R2 miljard per jaar kan kos. Die totale verliese weens veediefstal is dus astronomies, veral as in ag geneem word dat 60% tot 70% van alle veediefstal volgens navorsing nie aangemeld word nie.
Veral die distrik Steynsrus loop in die afgelope maande deur, sê Janeke. Veediewe het daar van April tot Junie 20 tot 31 stuks skaap per keer in drie voorvalle in die veld geslag.
Die probleem is op Vrystaat Landbou en die provinsiale polisiediens se gebruiklike tweemaandelikse bestuursvergadering op hoë vlak bespreek.
BRANDPUNTE
Mnr. Tommie Esterhuyse, voorsitter van Vrystaat Landbou se komitee vir wet en orde, sê hul oudit van die landelike beveiligingsplan het tien distrikte as brandpunte uitgewys. Die organisasie se strukture gaan die polisie help om veiligheid te verbeter. Die distrikte is Bethlehem, Ficksburg, Bloemspruit, Harrismith, Phuthaditjhaba, Selosesha, Zastron, Heilbron, Vrede en Bothaville.
Nog ’n probleem wat boere uitgewys het, is die oornag-oprigting van grafstene op plase ter wille van restitusie-eise – sonder die grondeienaars se medewete. Esterhuyse doen ’n beroep op boere om enige sulke verdagte optrede en voorvalle by Vrystaat Landbou en die polisie aan te meld. Hy het die polisie vir goeie verhoudinge bedank.