Indringerwet kom stadigaan op dreef
NUWE omgewingsregulasies oor indringerplante kan grondeienaars miljoene rande aan boetes kos, maar tot dusver vorder die toepassing daarvan maar stadig.
Die regulasies op uitheemse en indringerplantsoorte val onder die Wet op Nasionale Omgewingsbiodiversiteit (Wet 10 van 2004), en bevat ’n lys van 559 indringerplante, onder meer rooikrans, langblaarwattel en portjackson.
Die regulasies is sedert Oktober 2014 wet, en verplig grondeienaars om die Departement van Omgewingsake te voorsien van ’n lys van al die gelyste indringerplante op hul grond, en ook om dié plante te bekamp, uit te roei en verdere verspreiding te voorkom. Toepassing het egter eers onlangs begin.
Indien grondeienaars nie saamwerk nie, kan die Departement van Omgewingsake ’n bevel uitvaardig om die grondeienaar tot samewerking te dwing. Grondeienaars wat nie daaraan voldoen nie, is skuldig aan ’n misdryf, en kan ’n boete van tot R5 miljoen (vir ’n eerste oortreder) of tot R10 miljoen (vir verdere oortredings) opgelê word, of tronkstraf van tot 10 jaar.
Me. Monique Ditewig, ’n eiendomsregprokureur by Boy Louw Ingelyf in Paarl, sê enigiemand wat van plan is om grond te verkoop waarop gelyste indringerplante voorkom, is verplig om die koper daaroor in te lig.
“Alhoewel daar geen spesifieke verpligtinge uiteengesit word in die wet en die regulasies wat spesifiek op kopers van toepassing nie, is daar geen verpligting op potensiële verkopers om die betrokke indringerplante op die grond [...], uit te roei [voor dit verkoop word nie].”
Die statutêre verpligting om verdere verspreiding van die plante te voorkom, word dus aan die nuwe eienaar oorgedra. Enige voornemende koper moet van dié wetgewing, en die stand van die grond, bewus wees.
Daar is tot op hede nog geen gevalle van misdrywe aangemeld nie.
WETLIKE VERPLIGTINGE
Me. Kay Montgomery van die nieregeringsorganisasie Invasive Species South Africa sê grondeienaars moet in ag neem dat problematiese indringerplante die waarde van jou grond aansienlik laat daal.
“Indien jy ’n bevel ontvang, kan jy reusebedrae, wat etlike miljoene rande beloop, aan arbeid en toerusting moet bestee om van daardie plante ontslae te raak.”
Ofskoon die onus op grondeienaars rus om die regulasies na te kom, meen Ditewig eiendomsagente en prokureurs wat betrokke is by grondverkope moet seker maak verkopers kom hul verpligting na.
Volgens mnr. Boy Louw, WesKaapse prokureur vir Agri SA, is daar tot op hede nog geen gevalle van misdrywe aangemeld nie.
“Die wetgewing is redelik nuut en ons begin nou eers werklik sien hoe owerhede bevele uitreik.
“In al die gevalle waarvan ek weet, het die grondeienaars opgetree en planne vir die skoonmaak van indringerplante ingestel waarmee die owerhede tevrede was.”
Besoek
plante. – vir die volledige lys indringer