SITRUS | Droogte knel produksie

Suid-Afrika se sitrusproduksie het in die 2015-’16-seisoen met 7,5 miljoen kartonhouers, of 6%, gekrimp.

Luidens ’n onlangse verslag van die Nasionale Landboubemarkingsraad (NLBR) was pomelo’s die grootste verloorder in vanjaar se oesstatistieke met ‘n afname van 23% in produksie. Altesame 12,4 miljoen kartonhouers pomelo’s is uitgevoer teenoor 16,1 miljoen kartonhouers in 2015. Daar is ook 8% minder lemoene gelewer, maar die produksie van sagtesitrus, soos nartjies, het met 12% toegeneem en daar is 7% meer suurlemoene geoes.

Europa bly die grootste bestemming vir Suid-Afrikaanse lemoene, met 36% van die uitvoer wat vanjaar daarheen gaan. Die Midde-Ooste is die naasgrootste mark en verteenwoordig 25% van Suid-Afrika se lemoenuitvoer.

Brittanje koop die meeste Suid-Afrikaanse sagtesitrus en verteenwoordig 36% van die uitvoermark. Europa is die naasgrootste mark met 24%.

Die Midde-Ooste is Suid-Afrika se grootste uitvoermark vir suurlemoene. Die streek verteenwoordig 43% van die uitvoer met Europa op 21%.

Die afname in produksie het die plaaslike prys vir lemoene ondersteun. Teen Mei vanjaar het lemoene R3 405 per ton verdien teenoor R2 300 per ton verlede jaar. Daar is op die plaaslike mark tussen Januarie en Mei ook aansienlik meer vir pomelo’s betaal en daar is vir dié tydperk meer pomelo’s plaaslik verkoop. Dieselfde geld sagtesitrus, maar suurlemoene se prys het tussen Januarie en Mei vanjaar verlangsaam teenoor 2015.

– JASPER RAATS