STAAT SE VETERINÊRE STRATEGIE VERWELKOM
DIE Departement van Landbou, Bosbou en Visserye het ’n nasionale veterinêre strategie bekend gestel met die doel om die gesondheid van Suid-Afrika se diere te verseker sodat genoeg kos vir die nasie geproduseer kan word.
Volgens die Rooivleisprodusente-organisasie (RPO) kan dié strategie ’n groot rol speel om die nasionale kudde te beskerm en wesenlike uitvoer van rooivleis moontlik te maak.
Die bekendstelling volg nadat die internasionale organisasie vir dieregesondheid, die OIE, Suid-Afrika se veterinêre diens beoordeel het.
Die veterinêre diens speel ook ’n sleutelrol om te verseker dat vleis en ander produkte wat van diere afkomstig is, veilig is.
Die Departement van Landbou, Bosbou en Visserye se veterinêre strategie stel ’n samehangende wetenskaplik gebaseerde en voorkomende veterinêre diens in die vooruitsig.
Dit is gebaseer op die huidige Suid-Afrikaanse regsraamwerk, evaluasieverslae en konsultasie met belanghebbendes ingevolge die dieresiektebestuursplan.
Die strategie is ontwikkel met die missie om die welsyn van diere en mense te verbeter deur stelsels en meganismes daar te stel vir die voorsiening van ’n doeltreffende veterinêre diens. Dié diens moet die vermoë hê om diere- en openbare gesondheidsrisiko’s te verhinder, op te spoor, te beperk en uit te wis.