GOEIE DIERESORG ONONTBEERLIK IN VERANDERDE KLIMAAT
Dieresorg en aanduiders daarvan gaan belangriker word namate die uitwerking van klimaatsverandering groter word. Veeboere gaan veel meer aandag moet begin gee aan kunsmatige en natuurlike beskutting en skuiling vir hul diere, het prof. Schalk Cloete, veekundige van die Wes-Kaapse departement van landbou op Elsenburg, by Wellington op die jaarvergadering van die Rooivleisprodusente-organisasie gesê.
Hy het saam met prof. Stephanie Midgley van die Afrika-klimaat-en-ontwikkelingsinisiatief deelgeneem aan ’n gesprek oor aardverwarming en klimaatsverandering. Hy het gesê hoewel voorspellings nie rooskleurig is nie, moet aanvaar word dat klimaatsverandering ’n werklikheid is en dit gáán veeboere – en veral melkboere – in die toekoms raak. Skape en bokke blyk meer aanpasbaar te wees vir sulke veranderings as beeste.
Navorsing op Elsenburg, onder meer deur dr. Carel Muller, suiwelkundige wat pas afgetree het, dui daarop dat skadustrukture melkproduksie verbeter en alle plaasdiere in die algemeen bevoordeel. “Ons is egter besig om dieresorg vandag op ’n ander, veel meer gesofistikeerde manier as in die ver- lede te verstaan.” Skaduskuilings, sowel as natuurlike skuilings, soos windbrekers, om aanvoelbare temperature te verbeter, gaan in die toekoms belangriker word. “Dit gaan diere se oorlewingskanse drasties verbeter.”
Boere behoort in die toekoms ook te kyk na diererasse wat aanpasbaarder is by veranderende klimaatsfaktore. Kruisings sal daarby moet aanpas. Die Namakwa-Afrikaners en Dorpers kan byvoorbeeld gekruisteel word om vir albei rasse se voordelige eienskappe in ’n veranderende klimaat te selekteer. Só sal ook dalk gekyk moet word na ooie met ’n kleiner raam, maar wat groter bemarkbare lammers lewer.
“Daar is verskillende maniere om klimaatsverandering teen te werk. Navorsing is aan die gang om dié aspekte te verfyn,” het Schalk gesê.
Die Europese Unie (EU) handhaaf weens dekades van diereregte-aktivisme hoë dieresorg-standaarde. The Guardian het vroeër vanjaar berig die gevaar bestaan dat dié standaarde sal val as Brittanje die EU verlaat, omdat Britse dieresorgswette nie by die EU s’n bygehou het nie. –