Kleinskaalse wynmakers word wys
Jy het nie ’n plaas of ’n groot kelder nodig om jou eie wyn te maak nie. ’n Motorhuis, ’n ton of wat druiwe en ’n paar stukkies kombuistoerusting sal deug, vertel prof. Wessel du Toit van Maties, wat die afgelope elf jaar al bykans 1 500 waenhuis-wynmaker
Toe me. Frances Nel van Nieuwoudtville haarself vir ’n naweek lange kursus in kleinskaalse wynmaak in die JH Neethling-gebou op die Universiteit Stellenbosch (US) se kampus bevind het, was dit ’n soort tuiskoms.
Die gebou huisves al geslagte lank die departement wingerd- en wynkunde én is die tuiste van die Instituut vir Wynbiotegnologie (wat onder meer wyngiste navors).
Frances het destyds haar eerste jaar op Maties in die einste gebou deurgebring, vasbeslote om ’n wynmaker te word. Sy het egter weldra na ’n B.Sc.-kursus oorgeskakel, haar man, Japie, ontmoet en ’n rooibos-boervrou met ’n druiweprieël op die geskiedkundige plaas Cloudskraal buite Nieuwoudtville geword.
Die droom om haar eie wyn te maak, het egter in haar agterkop gesluimer en sy het by ’n naburige dorp se wyngilde aangesluit. Onlangs het die Nels ’n aangrensende rooibosteeplaas gekoop waarop ’n 13 jaar oue wingerdblok – hoofsaaklik Sauvignon blanc, ’n bietjie Chenin blanc, Colombar en Nouvelle – staan. Japie sê hulle het besluit om nog wingerd op die ou teelande op die Bokveldsberg se rand aan te plant. En dís hoe Frances weer in die JH Neethling-gebou beland het om die kursus in kleinskaalse wynbereiding by te woon. Dis alombekend as die garagiste-kursus wat mense touwys maak om klein hoeveelhede wyn as ’n stokperdjie te maak.
Die Nels wou seker maak hulle ken hul storie voor hulle ’n eie wynetiket ontwikkel.
“Ons plaas is een van twee in die hoogliggende Nieuwoudtville-omgewing met wyndruiwe daarop,” vertel Frances.
Die druiwe het dus ’n soort skaarsheidswaarde en die wingerd kan ’n interessante trekpleister wees vir die besoekers wat die oornaggeriewe op Cloudskraal gebruik. LIGGING
VANWAAR, GEHASIE?
Die woord “garagist” is die eerste keer in die 1990’s in die Bordeaux-streek in Frankryk half snobberig gebruik vir mense wat klein bietjies druiwe inkoop by boere om nog kleiner bietjies wyn daarvan te maak. Hul werksruimte was dikwels hul motorhuise,