Die waarde van wild Wild as kommoditeit het ’n goeie beleggingswaarde, hoewel kenners teen prysborrels waarsku. Belanghebbendes in die bedryf verduidelik hoe wild se prys bepaal word.
Wildpryse het in 2014 ’n hoogtepunt bereik en kopers moet op die uitkyk wees vir prysborrels, het mnr. Ernst Janovsky, hoof van Absa-Agribesigheid se sentrum vir uitnemendheid, op die Kirkwood-wildfees in die Oos-Kaap gesê.
Hy sê die algemene reël is dat wild se teelwaarde nie meer as vier keer die jagwaarde daarvan moet wees nie. ’n Swart rooibokram waarvan die jagwaarde byvoorbeeld R3 000 is, moet nie meer as R12 000 op ’n veiling behaal nie.
“Indien méér daarvoor betaal word, is jy in ’n borrel en gaan jy met ’n harde slag aarde toe kom,” sê Ernst.
Mnr. Wiaan van der Linde, president van Wildbedryf Suid-Afrika (WRSA), meen die waarde van wild word deur die eindverbruiker bepaal.
“Wanneer na wild se randwaarde gekyk word, is die jagprys die laagste prys of die vloerprys in Suid-Afrika. Dit gaan hoofsaaklik oor die rand per kilo en wat die waarde is wat die jagter gaan kry vir die bok wat hy skiet.”
Die spesie speel ook ’n rol en Wiaan sê enige Suid-Afrikaanse biltongjagter sal ’n premie by die prys sit vir die ondervinding en die voorreg om te kan jag.
Mnr. Johan Rabie, ’n wildboer van die Gravelotte-omgewing, spits hom toe op die teel van siektevrye buffels en swartwitpense.
Johan sê die teel en verkoop van wild is ’n groot besigheid in Suid-Afrika en dat dit selfs meer groei op jou belegging kan toon as ’n belegging op die Johannesburgse Effektebeurs (JSE).
“In wild is aanteel jou dividende. Wanneer jy goed presteer, kan jy 90% suksesvolle kalfgeboortes verwag waarvan die kalwers 40% van sy ma se gewig is. Die dividend is dus die aanteel,” sê hy.
BELEGGING
Johan sê die opbrengs van ’n belegging in wild word deur ’n paar faktore bevorder: Die prys van die betrokke spesie kan met verloop van tyd net soos die prys van ’n spesifieke aandeel styg of daal. LINKS: Die aanteel frekwensie en prestasie, dus waar die opbrengs van ’n belegging in aandele ook nog dividendinkomste kan verdien, is die aanteel van jou belegging in wild die dividend. Die skaarsheid van die betrokke spesie. Die vraag en aanbod van verskillende spesies het ’n groot invloed. Die genetiese gehalte van individuele diere binne ’n spesifieke spesie. Die vraag na wild word ook deur eksterne faktore beïnvloed wat ’n rol speel in die waarde van daardie wild, sê Johan.
“Die prys en opbrengs van graangewasse en dus die winsgewendheid van Suid-Afrikaanse graanboere het ongetwyfeld