Makietie metwilden wyn steun droogtefonds
Die hele gesin kan saamkuier en aan allerlei lekkernye smul op ’n fees in Gauteng wat wildsvleis en wyn in die kollig plaas. Daarby gaan ’n groot deel van die opbrengs van die fees gebruik word om boere te help.
Min dinge kan kers vashou by die smaaklike kombinasie van wildsvleis, biltong en wyn. Voeg daarby ’n paar dae se verblyf in die bos of ’n jagtog saam met vriende en jy het ’n wenresep wat al jou sintuie sal beïndruk.
Die Leriba-hotelgroep in Centurion beoog ’n reusefees wat wildsvleisgeregte en uitstekende wyn kombineer met ’n uitstalling van die land se voorste ekotoerismebestemmings en jaggeleenthede.
Dié wild-en-wynfees, A Wildlife and Wine Affair, word op 24 en 25 September by die Leriba Hotel en Spa in Clubview, Centurion, aangebied.
Dit is ’n kuiergeleentheid vir die hele gesin en ook ’n geleentheid om die stad nader aan die bos te bring. In een van die land se ergste droogtes nog kry wildboere ook baie swaar. Daarom is die geleentheid ten bate van die Droogtehulpfonds.
“Ons werk nou saam met Agri SA, Absa en Landbouweekblad. ’n Deel van die geld wat met die geleentheid ingesamel word, gaan reguit na die Droogtehulpfonds,” sê mnr. Peet du Preez, eienaar en uitvoerende hoof van die hotelgroep.
“Die SANParke Ereveldwagters ondersteun die geleentheid. Feesgangers sal hul volgende wegbreek na enige nasionale park daar en dan kan bespreek.”
WIE STAL UIT?
Wildplase, reservate en wynlandgoedere sal hul produkte en dienste tydens die fees beter bekend stel op Leriba se uitgestrekte grasperke onder die koeltebome. Wees dus op die uitkyk vir wyn teen kosprys, spesiale aanbiedinge op verblyf, wildbesigtiging en jagpakkette (vir die volgende jagtyd).
SANParke Ereveldwagters bied prettige, opvoedkundige sessies vir die jongklomp – en grootmense – aan oor natuurbewaring. Feesgangers sal nader kennis kan maak met ’n paar gewone en ongewone diere.
WILD EN WYN
Uitgesoekte Kaapse wynplase bied gratis wynproegeleenthede Lus vir ’n slukkie Pinotage en ’n springbokburger? Maak seker jy koop jou kaartjie vir A Wildlife and Wine Affair gedurende September in Centurion vir soortgelyke smulkos en wyn. aan en wyn is teen kelderpryse te koop. Die verskillende wildsplase en reservate sal ook gratis wildsvleishappies vir honger feesgangers aanbied.
Leriba se topsjefs sal verder allerlei peuselhappies, varsgebakte brood en slaaie aanbied. Diegene wat nie net wil peusel en proe nie, kan by enige van Leriba se restaurante draai vir vyfstermaaltye.
KAARTJIES
A Wildlife and Wine Affair word op Saterdag en Sondag 24 en 25 September van 10:00 tot 17:00 aangebied. Voorafbesprekings is noodsaaklik en kaartjies is beskikbaar by Computicket.
Kaartjies kos R185 en kinders jonger as 12 jaar kry gratis toegang. Ingesluit by die toegangsgeld is gratis wynproe (slegs volwassenes) en ’n peuselbuffet. Feesgangers kry ook toegang tot uitstallers se spesiale pryse vir wyn, wegbreeknaweke en jagpakkette.
Leriba Hotel en Spa is langs die Hennopsrivier by Endlaan 245, Clubview, Centurion. Veilige parkering is vir besoekers beskikbaar.