VERTRAGING VAN DAM KAN LANDBOU RAAK
VERTRAGINGS aan die Lesotho-hooglandwaterprojek weens beweerde politieke inmenging om ’n sekere maatskappy te bevoordeel, voorspel niks goeds vir die landbou nie.
Me. Thuli Madonsela, die Openbare Beskermer, is besig met ’n ondersoek nadat bewerings aan die lig gekom het dat me. Nomvula Mokonyane, Minister van Water en Sanitasie, die waterprojek “gekaap” het om te verseker dat die maatskappy LTE Consulting by die projek betrek word, berig die Sondagblad City Press. Volgens Mokonyane is die vertragings om te verseker dat maatskappye in swart besit by die projek betrokke raak.
Die waterprojek van R26 miljard is vir die bou van die Polihalidam in Lesotho en tonnels om die volgehoue toevoer van water uit Lesotho aan Gauteng en die gebiede wat deur die Vaalrivier bedien word, te verseker.
Luidens City Press is die aanvang van die projek met ’n jaar vertraag in ’n poging van Mokonyane om tyd te wen sodat LTE betrokke kan raak.
Bewerings word gemaak dat ervare amptenare van die Waterkommissie, wat as struikelblokke beskou was, van die projek verwyder en mense met minder ervaring, wat politici in Suid-Afrika én Lesotho se ondersteuning het, aangestel is.
Die Vaalrivierstelsel is een van die belangrikste waterbronne in Suid-Afrika en verskaf water aan 60% van die land se ekonomiese bedrywe. Dit sluit 45% van die bevolking (die hele Gauteng, Kimberley en Upington), myne en nywerhede in Mpumalanga se Hoëveld, die meeste van Eskom se steenkoolaangedrewe kragsentrales op die westelike Hoëveld van Mpumalanga en die goudvelde in die Vrystaat en Noordwes in. Dit verskaf ook water vir die landboubedrywighede in Gauteng, Noordwes, die Vrystaat en die Noord-Kaap.
Mnr. Nic Opperman, direkteur van natuurlike hulpbronne by Agri SA, sê die bou van die Polihalidam is inderwaarheid met vyf jaar vertraag.
Buitengewone reënval in die Vaalrivier-opvanggebied die afgelope 15 jaar en vloede by tye het genadiglik geen waterbeperkings tot gevolg gehad nie.
Opperman sê indien die droogte sou voortduur, kan daar volgende seisoen waarskynlik ’n waterbeperking van 20% vir besproeiing te wagte wees.
Kennisgewing vir waterbeperkings via die amptelike kanale duur sowat 6 maande.
Volgens die prysstrategie vir onbehandelde water het die landbou die laagste versekerbaarheid, wat beteken dat wanneer waterbeperkings ingestel word, die landbou die bedryf is wat eerste geraak word. –