MOEILIKE JAAR VIR HEUNINGBY-BOERE
SUID-AFRIKA se heuningproduksie het weens die droogte aansienlik gedaal weens ’n tekort aan kos vir bye.
Volgens mnr. Mike Miles, voorsitter van die plaaslike byebedryfsorganisasie (Sabio), het die vernietiging van uitheemse bloekombome, wat deel is van die ‘Working for Water’-veldtog, veral die Wes-Kaapse heuningproduksie benadeel.
“Daar is geen vervangerbome in die plek van die nektardraende bloekombome geplant nie. Daar is dus minder hulpbronne wat bye kan gebruik om heuning te maak.”
Hy sê dit is kommerwekkend dat plaaslike boere slegs ’n derde van die land se heuning produseer. Hulle ding boonop mee met heuning van China wat “teen aansienlik laer pryse as plaaslike produsente se produk verkoop word”.
Volgens hom is daar ‘n al hoe groter vraag na die bestuiwingsdienste van byeboere vir aanplantings, soos appel-, sitrus- en avokadoboorde, wat toeneem. Vrugteboere maak op die byeboere se bestuiwingsdienste staat vir die produksie van vrugte.
Miles moedig heuningboere aan om steeds vol te hou met hul higiëniese bestuurspraktyke om Amerikaanse jongbysiekte te bestry.
“Die siekte is in die afgelope seisoen deur die droogte ingeperk. Bye kon weer ná vorige uitbrekings herstel, maar die siekte het ’n sikliese aard en kan weer toeslaan.”