DIÉ WEEK IN DIE LANDBOU

LONE NÁ VERKIESING

Aanbevelings aan die Regering oor ’n nasionale minimum loon sal eers in September gereed wees, het die Minister van Arbeid, me. Mildred Oliphant, verlede week op ’n besoek aan plaaswerkers op De Doorns gesê. Plaaswerkers soek R150 per dag; tans is die sektorale vasstelling R128,26 per dag. Sy, mnr. Senzeni Zokwana, die Minister van Landbou, Bosbou en Visserye, en dié se adjunk, mnr. Mcebisi Skwatsha, het plaaswerkers oor arbeidsregte gespreek. Die plaaslike ANC-raadslid, mnr. Pat Marran, het gewaarsku dat leë beloftes dié gebied se tikkende tydbom weer sal laat bars as sosiaal-ekonomiese kwessies nie dringend aangeroer word nie.

TUTTI FRUTTI

Fruit SA en sy Italiaanse eweknie, die die Italiaanse vereniging vir vryhandel (Associazione Italiana Commercio Estero of AICE), het ’n memorandum van verstandhouding onderteken om handelsbande in die vrugtebedryf te versterk. Dié twee liggame onderneem om ekonomiese inligting uit te ruil en saam te werk met die deurgee van handelsbeleide en wetgewing ten einde handel te bevorder en ook op nywerheidsvlak saam te werk.

GM VRIENDE

Nuwe wetgewing wat gunstig staan teenoor geneties gemodifiseerde voedsel is onlangs in die Amerikaanse Huis van Verteenwoordigers aanvaar. Dit is in reaksie op sekere akiviste se veldtogte téén tegnologie vir GM. Volgens die nuwe wetgewing mag GM voedsel nie as veiliger of minder veilig as nie-GM voedsel behandel word nie. Diere wat met GM gewasse gevoer is, mag ook nie as GM geklassifiseer word nie. Maatskappye sal voorts inligting oor voedsel wat GMO bevat, in die vorm van ’n telefoonnommer of webbladskakel op hul etiket plaas.

SENWES GENOTEER

Die landbou-konsultantegroep Senwes is die eerste maatskappy om op Suid-Afrika se nuutste effektebeurs, ZAR X, genoteer te word. Die Senwes-groep het verlede week aangekondig hy gaan migreer van ’n verhandelingsmeganisme van oordie-toonbank tot ’n gelisensieerde omgewing om te voldoen aan nuwe wetgewing vir finansiële markte. Hierdie is ZAR X se eerste notering. Na verwagting sal die beurs in September begin aandele verhandel. Senwes sal steeds as makelaar en oordragsekretaris optree vir sy beleggers.

RED PHILIPPI

Aktiviste wat die kommersiële ontwikkeling van die Philippi-tuinbougebied in Kaapstad teenstaan, beweer die Stad Kaapstad is besig om van die landbougrond aan ontwikkelaars te verkoop. Lede van die Philippi-tuinbougebied se kos-en-landbouveldtog het op ’n notule van ’n vergadering van die Stad Kaapstad se ruimteli- ke beplanning-, omgewing- en grondgebruik-komitee afgekom, waarop ’n woon- en nywerheidsontwikkeling van meer as 500 hektaar bespreek is en waarin amptenare noem onderhandelinge is onderweg om grond naby aan die westelike deel van die gebied te koop. Meer as die helfte van die groente wat in Kaapstad verkoop word, word in dié gebied verbou.

VARSPRAATJIES

Die Produce Marketing Association se jaarlikse Fresh Connections-konferensie op 17 en 18 Augustus in Pretoria gaan hom toespits op uitdagings vir kleinboere, hoe kommersiële boere kan ontwikkel, die stand van die internasionale varsproduktemark, in- en uitvoerneigings, ontluikende markte in Asië en hoe om aanklank te vind by die groeiende swart middelklas. Bel 072 976 1285 of e-pos Claire@ storybookcommunications.com om te bespreek.

NÓG MIELIES

Suid-Afrikaanse silo’s het in die week van 11 Julie 11% meer mielies ingeneem as die vorige week. Witmielie-lewerings was 14% hoër en geel mielies 11% hoër. Volgens die landbousakekamer Agbiz staan Suid-Afrika se algehele mielieproduksie van week 1 tot 11 van die produksieseisoen op 4,3 miljoen ton, wat aandui dat meer mielies in komende weke gelewer kan word. Sien ook bl. 18.