WITMIELIETEKORT DALK TEEN EINDE VAN DIE JAAR
HOEWEL daar nou, ná strooptyd, genoeg wit mielies in Suid-Afrika beskikbaar is, kan tekorte later in die jaar ernstig raak, waarsku Global Risk Management (GRM), ’n Amerikaanse konsultantediens vir die graanbedryf.
Die GRM glo Suid-Afrika sal hoogs afhanklik wees van wit mielies wat van September af in Noord-Amerika geoes word, maar waarsku dat goedkeuring vir sekere geneties gemodifiseerde (GM) mielies invoer kan verhoed. Sekere stapelgeenkombinasies in die VSA is nie in SuidAfrika goedgekeur nie.
“Om die goedkeuringsproses aan te help, het ’n span van die Amerikaanse graanraad SuidAfrikaanse regeringsamptenare in Mei ontmoet, maar daar is nog geen verandering in die wetlike posisie nie.”
Sowat 72% van die Amerikaanse witmielie-oes vir hierdie seisoen sal GM kultivars wees.
Weens die gunstige internasionale prys is ’n 24% groter oppervlakte in Amerika beplant en tot dusver was die weer ook goed. Omdat min voorraad van wit mielies tans in die wêreld beskikbaar is, verwag die GRM dat pryse vir eers hoog sal bly.
Die verwagte witmielie-oes in die VSA sal meer as 4 miljoen ton wees, teenoor verlede seisoen se 3,2 miljoen ton en Mexiko se 24,2 miljoen ton teenoor die vorige seisoen se 24 miljoen ton (hoofsaaklik wit).
ONSEKER
Weens die droogte moet Suid-Afrika na raming vir die 2016-’17-bemarkingstydperk 3,8 miljoen ton mielies (1,1 miljoen ton wit en 2,7 miljoen ton geel) invoer.
“Ons vertrou dat ons die 2,7 miljoen ton geel mielies van die wêreldmark sal kry, maar dit is onseker waar die 1,1 miljoen ton wit mielies vandaan sal kom,” sê mnr. Wandile Sihlobo, hoof van landbou-ekonomie by Agbiz. Hy sê die feit dat die meeste Afrika-lande na Amerika en Mexiko kyk vir hul aanvulling van wit mielies kan meer druk op die globale mark plaas.
Van die 3,8 miljoen ton wat benodig word, is bykans 400 000 ton reeds sedert 1 Mei 2015 tot 22 Julie 2016 ingevoer. Daarvan is 124 559 ton wit mielies en 275 042 ton geel mielies.
Altesame 83% van die ingevoerde wit mielies het van Mexiko en 17% het van Amerika gekom. Al die mielies was nie-GM. Die geel mielies was van Argentinië afkomstig.
‘. . . dit is onseker waar die 1,1 miljoen ton wit mielies vandaan sal kom . . .’
VERTROUE
Mnr. Senzeni Zokwana, Minister van Landbou, Bosbou en Visserye, meen dat mense nie bekommerd hoef te wees dat die land voedseltekorte sal ervaar nie. Die bedryf kyk dat daar genoeg beskikbaar is en sy departement se taak is om toe te sien dat die infrastruktuur en bergingsgeriewe vir die mielies gereël word.
Hy glo ook daar hoef nie kommer te wees oor die invoer van GM mielies uit Amerika nie. Hy sê invoermaatskappye en sy departement is besig om seker te maak dat daar geen teenstrydighede in die beleid is rakende die invoer van sekere GM mieliesoorte uit Amerika wat nog nie in die land goedgekeur is nie.