PRIVATE SEKTOR SKUD SAK OM VLEISUITVOER TE BEVORDER
SUID-AFRIKA het nie naastenby genoeg vermoëns om aan ander lande se dieregesondheidsvereistes vir die in- en uitvoer van vleis te voldoen nie.
Daarom betaal die Assosiasie van Vleisinvoerders en -uitvoerders (Amie) van begin Julie af die salaris van ’n private veearts om met dié taak in die Durbanse hawe te help.
Mnr. Anton van Rensburg, uitvoerende hoof van Assign Trading en bestuurslid van Amie, sê die hoeveelheid rooivleis wat inen uitgevoer word, het geweldig toegeneem. Die ingevoerde vleis is dié wat ingevoer word om na die res van Afrika te gaan.
Van Rensburg sê onverwerkte sowel as verwerkte vleisprodukte word in- en uitgevoer.
Die betaling van die veearts se salaris is vir Amie bloot ’n tydelike oplossing en die organisasie gaan dit kwartaalliks hersien.
Van Rensburg sê in die eerste maand was daar baie aanvangsprobleme, maar sake verloop elke dag beter.
GROOT GELEENTHEDE VIR UITVOER
“’n Langtermynoplossing is egter nodig vir die verwagte groei in in- en uitvoer.
“Daar is geweldig groot potensiaal vir Suid-Afrika om vark- en beesvleis uit te voer.
“Die geleenthede om veral beesvleis uit te voer, is só groot dat dit vleispryse in Suid-Afrika na uitvoerpariteit kan laat styg.”
Van Rensburg sê die Departement van Handel en Nywerheid doen baie moeite om nuwe uitvoermarkte te ontgin.
So was daar onlangs ’n Russiese afvaardiging in Suid-Afrika, maar Suid-Afrika se dierege- sondheidstelsel het hulle glad nie tevrede gestel nie.
“Ons stel eenvoudig nie genoeg staatsveeartse aan nie,” sê hy. Van Rensburg sê lande wat goeie uitvoerbestemmings vir Suid-Afrikaanse rooivleis is, is gewoonlik ook lande wat na die land van herkoms se hele dieregesondheidstelsel kyk, nie net na spesifieke slagplase nie.
‘Daar is geweldig groot potensiaal vir SuidAfrika om vark- en beesvleis uit te voer.’