Sakevertroue tel kop op
LANDBOUSAKELUI is meer optimisties oor vooruitsigte vir omset en netto bedryfsinkomste, maar in die algemeen steeds pessimisties oor saketoestande in die land.
Die landbousakekamer Agbiz se sakevertroue-indeks vir die tweede kwartaal van vanjaar het met altesame 4 indekspunte tot 47 verbeter.
’n Punt laer as 50 beteken daar is steeds ’n inkrimping in sakebedrywighede, het mnr. Wandile Sihlobo, hoof van ekonomiese en landbousake-inligting by Agbiz, gesê.
Dit is die vyfde agtereenvolgende kwartaal dat die indeks laer as 50 punte is.
Sihlobo sê die beter opvattings oor omset en bedryfsinkomste kan aan die hoër pryse van landbouprodukte toegeskryf word, asook voordele wat die swakker rand vir uitvoerders kan inhou.
Vertroue oor algemene landboutoestande het met 6 indekspunte tot 23 verbeter.
Sihlobo sê in die vorige kwartaal was daar kommer dat ryp die opbrengs van laat aanplantings kan beperk.
“Toestande was toe egter in die algemeen betreklik gunstig.”
Ook vertroue rondom die voorsiening wat vir swak skuld gemaak moet word, het met 8 punte tot 75 verbeter.
“Die verbetering dui daarop dat sommige boere dalk in ’n beter posisie kan wees om hul skuldverpligtinge na te kom.”
Sihlobo sê vertroue oor kapitaalbelegging het verrassend met 5 indekspunte tot 67 verbeter, maar daar is voortgesette kommer oor politieke en beleidsonsekerheid, veral oor voorstelle vir grondhervormings.
UITVOER, EKONOMIE: HOOP ÁL MINDER
Vertroue rondom uitvoervolumes het met 25 indekspunte tot 50 gedaal, die laagste vlak sedert die derde kwartaal van verlede jaar.
Sihlobo sê dit was te verwagte weens die oes wat sowat 26% kleiner is as dié van die vorige somer, wat reeds 28% kleiner as dié van 2014 was.
Sakelui se vertroue oor die land se ekonomiese groei was op slegs 4 indekspunte die laagste sedert die tweede kwartaal van 2008.
Sihlobo sê dit strook met die Reserwebank se verwagting dat ekonomiese groei vanjaar kan stagneer.
Hy is hoopvol dat landboutoestande in die komende maande gaan verbeter omdat ’n hele aantal weervoorspellers meen daar is ’n moontlikhied van 65% vir ’n El Niña in die laat lente en deur die somer.
‘Sommige boere kan dalk in ’n beter posisie wees om hul skuldverpligtinge na te kom.’