VOEDSELSEKERHEID | Gevolge van droogte wys eers later

SuidAfrika se voedselsekerheid is die hoogste in Afrika suid van die Sahara. En uit die hoër middelinkomstelande waarmee SuidAfrika vergelyk kan word, is hy vanjaar tiende uit 25 lande.

SuidAfrika het vanjaar ’n hoër telling as verlede jaar behaal in die Economist Intelligence Unit se gesaghebbende wêreldvoedselsekerheidsindeks, maar sy globale posisie het van 46 tot 47 gedaal uit die 113 lande wat gemeet is. Dié verslag word die afgelope vyf jaar in opdrag van DuPont Pioneer gedoen.

Mnr. Prabdeep Bajva, DuPont Pioneer se streekdirekteur vir Afrika, sê die impak van vanjaar se droogte sal waarskynlik eers in volgende jaar se indeks merkbaarder wees.

’n Land se voedselsekerheid word gemeet aan die hand van 28 aanduiders wat breedweg in bekostigbaarheid, beskikbaarheid en gehalte/veiligheid verdeel word. SuidAfrika het onderskeidelik 58,6, 68,1 en 59,7 uit 100 daarvoor ontvang.

SuidAfrika se sterk punte is onder meer die standaarde van voedingsgehalte en programme om armes teen prysskokke te beskerm. Die doeltreffendheid van die land se voedselvoorraad, landbouinfrastruktuur en die gemiddelde huishoudelike besteding aan kos het gemiddelde syfers behaal.

Die grootste swakhede lê by die gedeelte van die bevolking wat onder die wêreldarmoedevlak leef, toegang tot finansiering vir boere en die beskikbaarheid van vitamien A in diëte.

Die gemiddelde huishoudelike besteding aan kos oor die hele indeks het oor die afgelope vyf jaar met 11% afgeneem, bykans 70% van die lande het omvattende voedingstandaarde en ontwikkelende lande het ’n groter verskeidenheid in hul diëte.

Wêreldwyd het Amerika, Ierland en Singapoer die beste gevaar en Tsjad, Sierra Leone en Burundi die swakste. — NICO VAN BURICK