MIN DATA POOTJIE VERHANDELING IN SPEENKALWERS
TERMYNKONTRAKTE vir speenkalwers sukkel om op dreef te kom op die JSE se mark vir afgeleide instrumente weens die ingewikkelde samestelling van speenkalfpryse.
Daar word beoog dat ’n verkoper 1 000 kg of vier speenkalwers per kontrak sal kan verkoop. Die grootte maak dit moontlik vir kleiner verkopers om ook die kommoditeitsmark te gebruik.
Die kontrakte word aan die einde van die termyn met kontant vereffen.
Dr. Raphael Karuaihe, kommoditeitsbestuurder by die JSE, sê geloofwaardige inligting oor heersende pryse is nodig om die pryse van die kontrakte vooraf vas te stel. “Ons benodig verskeie bydraers van prysinligting, hetsy voerkrale of lewendehawe-agente wat by die JSE moet inteken om hierdie verifieerbare data te verskaf.”
Hy sê hulle moet nog met die bedryf ooreenkom oor of die voerkraalkoopprys, die veilingsprys of ’n kombinasie van albei gebruik moet word. Dan sal hulle dié inligting gebruik om vas te stel watter beesras en gewig die gestandaardiseerde termynkontrak sal bepaal.
VERANDERLIKES
Volgens mnr. Dave Ford, uitvoerende hoof van die Suid-Afrikaanse Voerkraalvereniging, is dit makliker gesê as gedaan om die pryse van speenkalwers te bepaal. “Dit is baie makliker om ’n beeskarkas te beskryf, met slegs die klas en gewig wat ’n rol speel by prysbepaling in die slagplaas.”
Daarteenoor is daar heelwat meer veranderlikes wat in ag geneem word wanneer ’n speenkalfprys bereken word. Vir ’n speenkalf kan onder meer die veilingsprys, die verkoopprys op die plaas of ’n gelande prys by ’n voerkraal gebruik word. Daarby moet ander veranderlikes, soos die gewigsklas, ouderdom, voerkraaltipe, beesras en die persentasie verse in die transaksie, in ag geneem word. Dit maak dit veel moeiliker om ’n basisprys te bereken.
Karuaihe sê hierdie tipe vleiskontrakte bied ’n buffer teen prysskommelinge op die mark en is tot voordeel van almal in die lewendehawe- of beesvleisbedryf.
Ford stem saam dat ’n speenkalf-termynkontrak stabiliteit kan bring, maar rolspelers in die bedryf is nog verdeeld oor of hulle belang stel om deel te neem.
“Ek stel voor die JSE kry eers drie groot voerkrale om in die stelsel in te koop en hul speenkalf-aankoopprysdata en kalfbeskrywings te gebruik. Van daar af kan voortgebou word wanneer daar meer selfvertroue in die bedryf is.”
BEESKONTRAKTE
Danksy goeie samewerking van die Rooivleis-abattoirvereniging kon die JSE reeds sedert Januarie ’n beeskarkas-termynkontrak aan kopers en verkopers bied. Die JSE het reeds termynkontrakte vir Maart en Junie vereffen.