Kanola gaan van krag tot krag
DIE kanolabedryf was die afgelope vier jaar die land se toppresteerder wat produksie betref.
“Die kanolabedryf is ’n ware suksesstorie vir Suid-Afrika en iets waarop die bedryf trots kan wees,” sê prof. Ferdi Meyer, direkteur van die Buro vir Voedselen Landbou-beleid (BFAP).
Volgens die BFAP het die produksie in die bedryf sedert 2011 op ’n jaargrondslag met gemiddeld 6% gestyg. Meyer sê kanola is besig om aansienlik veld in die wintergraanproduksiegebiede te wen danksy die bydrae van meer volhoubare wisselboustelsels, waar die gewas met onder meer koring, gars en kuilvoergewasse geroteer word.
“Dié wisselboustelsels is doeltreffend vir die opbrengste van die ander gewasse en is die hoof-aansporing vir kanolaproduksie in veral die Suid-Kaap,” sê Meyer.
HOËR INKOMSTE
Meyer sê volgens data uit die Overberg-produksiestreek het die kanolaboere tussen 2010 en verlede jaar gemiddeld net meer as R2 500 per hektaar gekry, teenoor ongeveer R4 300 vir koring en R4 500 vir gars.
“Indien boere egter hul opbrengs met beter produksiemetodes en beter kultivars van gemiddeld 1,4 t/ha tot ongeveer 1,76 t/ha kan verhoog, sal die inkomste wat hulle behaal, soos geprojekteer vir vanjaar tot 2018, met dié van koring en gars kan meeding,” sê hy.
BFAP projekteer dié hoër opbrengs sal ’n inkomste van tot R3 700 per hektaar kan behaal. Daarteenoor sal koring en gars onderskeidelik R3 300 en R3 700 per hektaar verdien, gegewe die gemiddelde opbrengste en prysneigings die afgelope 10 jaar.
“Daar moet in ag geneem word dat boere in die Suid-Kaap die afgelope vyf jaar rekordoeste vir hul grane van die lande afgehaal het, wat nie noodwendig vir die gars- en koringoeste in die toekoms volhoubaar is nie.”
AANPLANTINGS
In 2014 is ongeveer 95 000 hektaar kanola aangeplant, en die BFAP voorspel dat daar teen 2024 meer as 270 000 hektaar in die winterreënstreke aangeplant sal word. Wisselbou sal volgens die voorspelling die groei van aanplantings in die Suid-Kaap demp, en toekomstige groei sal hoofsaaklik in die Swartland plaasvind.