WISSELKOERS-SKOMMELING KWEL VRUGTEBEDRYF
HOEWEL Brittanje se besluit om die Europese Unie te verlaat nie onmiddellike kwellinge vir TruCape, die grootste appel-en-peerbemarker in Suid-Afrika, veroorsaak nie, is die verswakking van die Britse pond slegte nuus.
Só sê die maatskappy se besturende direkteur, mnr. Roelf Pienaar. Al Tru-Cape se produsente in die Ceres- en Grabouw-omgewing het klaar geoes, en die sektor het op die oomblik geldeenheidstabiliteit broodnodig.
“Dit wat ons gewen het as gevolg van die swakker rand in die eerste deel van die seisoen was van korte duur. Ons produksiekoste is in dollars en ons het wisselkoersstabiliteit nodig, teen watter vlak ook al.”
Die groep verwag dat die verkiesing verdere wisselvalligheid in die geldeenheid sal bring.
Kleiner vrugte en probleme met gehalte – hoofsaaklik weens die hoë somertemperature – het boere opdraand gegee.
“Ons kon ’n huis en bevredigende waardes vir die kleiner vrugte kry,” sê Pienaar, wat aanvanklik besorg was.
“Ons moes heelwat van die opbrengs BO: INLAS: na die Verenigde Koninkryk en die plaaslike mark skuif.”
VELDTOGTE BYT
Boonop het Britse supermarkte se veldtogte wat verbruikers aanmoedig om eerder Engelse produkte te koop die plaaslike appelen peermark effens geknou.
“Die veldtogte gebeur nog al die jare, maar die kleinhandelaars was vanjaar meer gerat daarvoor. Hulle wou ’n trots Britse gevoel oordra en sommige van die kleinhandelaars het Britse vlaggies op hul verpakkings aangebring.”
Pienaar sê ondanks die feit dat die Britse appel- en peervoorraad vanjaar sowat 10% meer is, hoop hulle om die invloed van die Britse veldtogte teë te werk deur ’n bietjie langer op die mark vrugte te bemark. Geleenthede in Afrika, danksy die olieprys, behoort ook te help om die markkreukels uit te stryk.
“Die olieprys het deur die $50kerf (sowat R715) gebreek, wat beteken dat uitvoer na Afrika, veral Nigerië, besig is om kop op te tel.
“Golden Delicious bly die topverkoper-appelkultivar in Wes-Afrika. Dis duideliker as ooit tevore dat ons genoeg volumes in dié mark moet hê voor die Ramadan-tydperk,” sê Pienaar.
Volgens hom neem hulle ook in Asië waar dat mense die appelvoorraad voor Ramadan opkoop. Tydens Ramadan neem die vraag aansienlik af.
VERKIESINGSPANNING
Die bedryf hou asem op oor moontlike probleme wat in die aanloop tot vandeesweek se munisipale verkiesing kan opduik omdat daar dikwels in die verlede faksieprobleme en protesaksie in die tydperk voor verkiesings uitgebreek het.
“Ons hoop nie die Wes-Kaapse landboubedryf word beïnvloed deur pogings om oor kort termyn politieke punte te wen nie.
“Die bedryf dra elke jaar meer as R6 miljard tot die ekonomie by.” Meer as 15 200 mense en hul gesinne maak ’n bestaan uit die bedryf.