LIGBESOEDELING MAAK BRITSE LENTE VROEËR
Bome in Brittanje begin ’n week vroeër bot vanweë ligbesoedeling.
Navorsers onder leiding van prof. Richard ffrenchConstant van die Universiteit van Exeter se sentrum vir ekologie en bewaring het gevind die bome begin tot sewe en ’n half dae vroeër bot in gebiede wat helder belig is. Die uitwerking van ligbesoedeling is groter op spesies wat gewoonlik later bot.
Hoewel die verband tussen ligbesoedeling en veranderinge in die gedrag van diere welbekend is, is dit die eerste keer dat die impak op plantfenologie (die studie van sikliese en seisoenale natuurlike verskynsels, veral in verband met die klimaat en plant en dierelewe) op ’n landwye skaal ondersoek is.
FfrenchConstant en sy span meen vroeë bot kan ’n uitwerking hê op die lewensiklus van insekte en voëls wat in sinchronisasie met die bome leef. “Die resultate beklemtoon die behoefte aan eksperimente om die uitwerking wat kunsmatige beligting deur die nag op fenologie en interaksies tussen spesies het, vas te stel.”
Die navorsers het data wat “burgerwetenskaplikes” 13 jaar lank regoor Brittanje versamel het, gebruik om die uitwerking van kunsmatige lig op bottyd te bepaal. Die data is as deel van die Woodlandtrust se Nature’s Calendarinisiatief versamel. Die publiek is gevra om aan te teken wanneer hulle Amerikaanse plataan, eike, es en beukehoutbome met blare sien.
Dr. Kate Lewthwaite, bestuurder van die Woodlandtrust se program vir burgerwetenskap, sê ontledings van die Nature’s Calendardata dui daarop dat ’n verhoogde koers van verstedeliking druk plaas op die natuur op maniere wat hulle nie kon voor sien nie.
“Soos dit moeiliker word om die seisoene te voorspel, sal ons inheemse natuurlewe sukkel om tred te hou met wisselinge wat hul habitatte en voedselbronne beïnvloed.”
Hulle hoop die navorsing kan daartoe lei dat dié kwessie op nuwe maniere getakel word en beter besluite geneem word.