Mediumraam-Merino’s die antwoord vir gehalte-fynwol
Groter beteken nie noodwendig beter en meer winsgewend nie. Met sy mediumraamMerino’s beweeg mnr. Johan Müller van Mosselbaai van dié “uitgediende siening” weg en kweek suiwer fynwol van gemiddeld 18,2 mikron en selfs fyner. Boonop maak hy net soveel geld
Die natuur duld geen uiterstes nie – en dis ook mnr. Johan Müller van Mosselbaai se slagspreuk met sy Merino’s. “Wanneer ’n dier te groot geteel word, kan sy haarself nie op die lang duur handhaaf nie. Êrens word eienskappe prysgegee.” Suid-Afrikaanse Merino’s is oor die algemeen grootraamdiere (sowat 80 kg) wat geteel word om in goeie voedingstoestande te presteer. Johan beweeg weg van dié standaard, en teel mediumraam-Merino’s (50 kg tot 60 kg) wat op normale, natuurlike suurveldweiding moet reproduseer en fynwol lewer. “Enige skaap kan só gevoer word dat sy kondisie uitstekend is, maar my diere moet op natuurlike weiding kan presteer.”
Prestasiesyfers en rekordhouding is goeie hulpmiddels, glo Johan, maar nie die alfa en omega nie. “Ek hou daarvan om my skape met die hand-en-oogmetode te klas.” En dié wêreldrekordhouer in skaaptel kán maar so praat, want hy kyk fyn (sien kassie op bl. 49).
“Slegs die ramme word getoets, want die ramkopers – en ek – wil weet wat elkeen se mikron is. Ek konsentreer daarop om sekere moedereienskappe, soos gehardheid, in my skape te behou.”
DRAAIPUNT VAN DIE BOERDERY
Johan se pa, wyle Jurie, en oupa het ook met Merino’s geboer. “Dié ras kom eintlik vanuit die 1800’s saam met die familie,” sê Johan.
’n Draaipunt was egter toe sy pa in 1957 ’n volledige stoetery van die bekende UysMerinofamilie van Heidelberg gekoop het. “Dit is waar die grondslag van ons Merinostoetery, Witteklip, gelê is.” Die stoetery bestaan tans uit sowat 4 000 Merino’s.
Johan boer ook met sowat 5 000 kommersiële Merino’s, wat nie as ’n stoetery geregistreer is nie.
Hy het in 1984 saam met sy pa en sy broer, Heyns, begin boer. Vandag is hy en Heyns steeds saam in ’n vennootskap, H.J. Müller en Seuns, bekend as Witteklip-boerdery. Johan hanteer die Merinovertakking en Heyns die sowat 120 Holsteins in melk op weiding.
“Ons plant en ondersaai lusern saam met koring, hoofsaaklik vir weiding vir die beeste en Merino’s.
“Omdat kweekgras volop in die SuidKaap voorkom, plant en boer ons in harmo-