Die Charolais, ’n eeue oue suiwer Franse beesras, bied verskeie voordele aan boere van Suid-Afrika om winsgewend te kan boer.
Die Charolais-beestelersgenootskap van Suid-Afrika vier vanjaar sy 50ste bestaansjaar. Dié Franse beesras is gelouter deur eeue se genetiese vordering en seleksie. Die Charolais is ’n suiwer ras en het sy ontstaan meer as 400 jaar gelede in die ooste van Frankryk. Dit is nie verwant aan enige ander ras nie. Die ras het in die 16de en 17de eeu reeds naam gemaak as ’n waardevolle, veeldoelige ras.
Die voortreflike bespiering wat vandag nog kenmerkend van die ras is, spruit uit die Charolais se geskiedenis as trekdier.
Reeds in 1864 is die eerste Charolais-kuddeboek in Frankryk aangeteken. Vandag is daar diere met ’n stamboom wat oor meer as 130 jaar strek. Teen 1907 was daar 1 026 000 Charolais-beeste in Frankryk.
Deesdae is die ras steeds die belangrikste vleisbeesras in Frankryk en een van die belangrikste beesrasse in Europa. Tans is daar meer as 2,5 miljoen geregistreerde diere in Frankryk alleen.
PLAASLIKE SPORE
Die eerste Charolais is in 1956 na Suid-Afrika uitgevoer. Op 25 Maart 1966 is die Charolais-beestelersgenootskap met ’n ledetal van 11 telers gestig.
Van die begin af word die genootskap bestuur deur ’n president, visepresident en vyf raadslede (die dagbestuur). Die 50ste bestaansjaar word op 11 Augustus op Kroonstad gevier.
VOORDELE
Charolais se nut in kruisteelprogramme is welbekend. ’n Geregistreerde Charolaisbul bied aan die kommersiële teler die volgende voordele wat meer geld in die beesboer se sak beteken. Die Charolais het uitsonderlike erfdwang vanweë die lang geskiedenis van suiwer teling. Heterose (basterkrag) vind by gewone kommersiële koeie inslag en dit verseker ’n swaarder speenkalf. ’n Uitsonderlike groeivermoë. Die beste voeromsettingsverhouding. ’n Uitstekende uitslagpersentasie. ’n Bogemiddelde karkasgehalte. Die Charolais bied maer vleis, presies wat die mark vra. ’n Rustige temperament.
RASEIENSKAPPE
Die Charolais is ’n medium- tot grootraam-, funksionele bees met ’n eenvormige, wit, roomkleurige haarkleed. Die dier is struktureel korrek gebalanseerd en het voortreflike bespiering. Hierdie beeste loop en beweeg gemaklik en het ’n kalm geaardheid. ’n Charolais het voldoende kapasiteit rakende lengte, breedte en diepte.
’n Geregistreerde Charolais het ’n vyfgenerasie-stamboom en produksiemetingstandaarde. ’n Opgeleide keurder is verantwoordelik vir die keuring. Vroulike diere moet aan reproduksiestandaarde voldoen.
TOEKOMSVISIE
Die visie van die genootskap is die bevordering en uitbouing van ’n moeitevrye, ekonomiese, hoogs doeltreffende vleisbeesras wat aangepas is by Suider-Afrikaanse weiding- en voerkraaltoestande.
Die hoofdoelwit is om altyd aan die voorpunt van genetiese ontwikkeling te bly met die gebruik van BLUP-teelwaardes en die toepassing van genomika.
HOOGTEPUNTE
Die Charolais-gedenkjoernaal ter viering van die genootskap se 50ste bestaansjaar is reeds gepubliseer en is by die genootskap te koop teen R100. Op Donderdag 11 Augustus hou die genootskap sy galadinee en prysuitdelingsgeleentheid saam met oudtelers. Die nasionale Charolais-veiling word op Vrydag 12 Augustus by die Kroon Boma op Kroonstad gehou.