Monotec voeg nuwe modelle by Monosem-planters
Monotec se nuwe Quad-Max-reeks het ’n 18 m-planter vir die geenbewerkingsboer, skryf mnr. Arend Langer van Monotec.
Monotec het ’n nuwe planter bekend gestel wat nouer rywydtes bied. Dié neiging word ál meer in die Suid-Afrikaanse landboubedryf gesien. Dit vereis nuwer, groter planters met hoër akkuraatheid en minder staantyd.
Vir rywydtes van 52,5 cm en smaller, stel Monotec Suid-Afrika sy nuwe Quad-Max-modelreeks voor.
Die Quad-Max-model se raam en die massiewe kunsmisen saadhouers van die planter is nuut ontwerp. Die bekende Monosem-karretjies en Fertisystem-kunsmisuitdraaiers is steeds daar. Rywydtes van 45 cm tot 91,4 cm is moontlik.
KONFIGURASIES
Planterkonfigurasies tot 36 rye word bereik sonder ’n swaar raam wat vorentoe of boontoe moet opvou vir vervoer. Wye konfigurasies bestaan uit twee of drie modules van ses, agt, tien of twaalf rye wat permanent aanmekaar gehaak bly en dwars van die land af gesleep word.
Geen waaiers, hidrouliese motors of horisontale vervoerpype is nodig om die saad en kunsmis vanuit die grootmaatbak tot by die karretjies te kry nie. Die eweredige gewigsverspreiding tussen die vier wiele op elke seksie van die planter is nog ’n voordeel van die Quad-Max.
Hierdie model is gebou vir geenbewerking, maar is ook as ’n konvensionele masjien beskikbaar. Kopers kan ook kies uit ’n wye reeks kunsmiswerktuie, soos Monotec se gewilde kouter-en-wegbreektandkombinasie en die nuwe kouter-en-dubbelskyfkombinasie. 021 865 2048; Voorheen is na die Quattro verwys, maar dié werktuig se naam het intussen na die Quad-Max verander.
Mnr. Arend Langer is die eienaar en uitvoerende direkteur van Monotec en Carrotech. info@monotec.co.za