DIÉ WEEK IN DIE LANDBOU
NATNATAL
Suikerboere in KwaZulu-Natal se Middelland het onlangs binne drie dae meer as 100 mm reën gekry. Teen einde Julie het die Treetops-suikerrietboerdery naby Eston amper 600 mm reën gemeet vir 2016, teenoor 650 mm die ganse 2015 en slegs 478 mm in 2014. Treetops se mnr. Roy McGladdery sê ofskoon dié reën nie meer ’n invloed sal hê op die huidige oes nie, is dit uitstekend vir volgende jaar se oes. Boere hoop ook dat die koue die invloed van die eldanamot, wat veral weens die droogte en hitte groot skade veroorsaak, sal beperk. Sien ook berigte op bl. 20 en 22.
PLUIMPOLITIEK
Die pluimveeprodusent Sovereign het sy mededinger Country Bird Holdings (CBH) se planne om ’n skema vir swart bemagtiging op ’n aandeelhouersvergadering uit te stem, gesnoeker. Sovereign het die vergadering uitgestel tot Oktober, vyf weke nadat CBH se aanbod verval om sy aandeelhoudingtot 50%plus1teverhoog.CBH wil sy aandeelhouding verhoog om die pluimveebedryf te konsolideer.
WRAAKMOORD?
Daar is bespiegeling dat die moord op ’n boer van Steynsburg, mnr. Brent Gibbons (45) van die plaas Fontein- tjie, moontlik ’n wraakaanval was. Hy is verlede Sondagaand omstreeks 20:20 in sy kombuisdeur doodgeskiet. Sy vrou, Willemien (43), is ook in die aanval gewond en was teen druktyd in die waakeenheid van ’n Port Elizabethse hospitaal. Hul drie dogtertjies en dié se ouma, me. Carien Steyn, is ongedeerd. Mnr. Douglas Stern, voorsitter van Agri Oos-Kaap, meen dit was nie ’n gewone plaasaanval nie, aangesien niks geroof is nie.
BEESBEDRYF SLAG
Dit kan twee tot vier jaar wees voordat weiding herstel, en hoë voerpryse sal eers in Junie volgende jaar begin val, het prof. Johan Willemse, Vrystaatse ekonoom, op ’n werksessie van die Devon-slagplaas en die Rooivleisabattoirvereniging gesê. Tans is sowat die helfte van speenkalwers wat verkoop word, vroulike diere, waar dit gewoonlik 30% is. Hy voorspel ook dat sommige beesboere na wild sal oorslaan. Sien ook bl. 14.
VALENCIAS VORT
Suid-Afrika gaan weens die droogte amper 10% minder Valencia-lemoene oes as aanvanklik verwag. Die Sitruskwekersvereniging se Valencia-fokusgroep het sy skatting met 4,8 miljoen kartonhouers van 15 kg verklein tot 41,6 miljoen kartonhouers – 21% laer as verlede jaar se oes. Mnr. Justin Chadwick, uitvoerende hoof van die vereniging, het gesê toe kwekers hul Valencias begin oes, “was die vrugte eenvoudig nie daar nie”.
GRENSGESPUIS
Rowers wat in groepe beweeg, het skynbaar plase op die Lesothogrens in hul visier. Volgens Vrystaat Landbou was daar onlangs twee aanvalle binne drie dae by Clocolan waar groepe van drie tot sewe mans plaasinwoners aangerand en geld van hulle geëis het. In een geval is ’n boer en sy gesin op ’n Sondagaand by die huis ingewag, hulle is beroof en die rowers het in die gesin se bakkie gevlug. In ’n ander geval is ’n boer gedwing om sy aanvallers naby die dorp te gaan aflaai. Daar word vermoed dat die aanvallers uit Lesotho kom.
MSD SE BESTE
’n Akademie wat koöperasiepersoneel oplei om boere by te staan oor dieregesondheid, is aangewys as een van die beste projekte wat deur personeel van die multinasionale dieregesondheidsmaatskappy MSD bedryf word. Mnr. Willem Kleyn, nasionale sleutelbestuurder vir landboubesighede by MSD, het die eerbewys ontvang vir die Malelane-akademie, wat oor die afgelope elf jaar al meer as 3 500 mense opgelei het. Kleyn was een van tien finaliste van oor die hele wêreld wat in New York, Amerika, voorleggings oor hul projekte gedoen het.
BESSIEBEGIN
Die landbougroep DuToit Agri verwag om vandeesmaand sy eerste bloubessies van ’n 5 ha-proefplantasie onder nette in die Langkloof te oes. FruitNet berig die plantasie is deel van ’n vennootskap met die Kaapse maatskappy United Exports om produkte met hoër waarde in die Oos-Kaap te verbou. Die groep, ’n bekende appel-, peeren steenvrugprodusent, belê tans ook in soetpatats en kersies.