Die stormagtige pad van graan

WAT ’n lekker wandeling deur die dekades bied Graan SA se uitmuntende projek om die geskiedenis van die graan- en oliesadebedryf te boekstaaf! Manie verwys na die elektroniese boek met die titel Die Graan- en Oliesadebedryf van Suid-Afrika – ’n Reis deur tyd, wat pas bekend gestel is.

Dit gaan haal die geskiedenis by 1902 en neem dit tot vandag. Tussendeur skets die boek die ontstaan van Sampi (die Suid-Afrikaanse Mielieprodusente-instituut) om die mielieboere te verteenwoordig, die stormagtige jare en botsings met die staat oor die mielieprys, en vandag se magtige Graan SA, wat in Jannie de Villiers se woorde ’n moderne organisasie is wat nie van die staat afhanklik is nie, maar met ledeheffings funksioneer. Louw Steytler stel dit nóg sterker: GSA is onstuitbaar.

Geluk aan die redaksie, onder Jozeph du Plessis se voorsitterskap, wat vir die samestelling verantwoordelik was. Dit was ’n massiewe spanpoging deur ’n magdom mense wat deur die jare die pad van die graanboere gestap het. In die proses moes elke feit, verhaal en staaltjie aan die waarheid getoets word deur ander bronne te raadpleeg totdat die komitee seker was dit is ’n feit en nie ’n fabel nie.

Die bekendstelling van die boek is – heel gepas – op Nampopark by Bothaville gehou, waar ’n groot aantal huidige en voormalige hoofbestuurslede en amptenare saamgetrek het. Daar was ook ’n hand vol oud-voorsitters.

Daar is lekker gesels en gelag oor die ou dae. Só is vertel dat Jan van Riebeeck al in sý jare ’n afvaardiging van boere wat nie met die koringprys tevrede was nie, te woord moes staan.

’n Belangrike deel van die boek gaan oor die ontstaan van die eertydse Sampi-oesdag in 1967, onder die leierskap van die Drie Musketiers, Moos Haddad, Hannes van Wyk en George Stegman, buite Bloemfontein. Later is drie verskillende oesdae in die mielieproduserende gebiede gehou, totdat die huidige Oesdagterrein aangekoop en die projek mettertyd na die Nampo-Oesdag herdoop is.

Ja, hoe stormagtig was daardie dekades nie, maar hoe lekker is dit nie om vandag terug te kyk na die geskiedenis nie. ’n Mens vergeet mos van die seerkry en onthou net die lekkerkry!

NENEGATE MAAK DALK ANDER DEURE OOP

Wanneer ’n oud-Minister van Finansies en vooraanstaande ANC-lid sê “bedank boere vir die kos wat julle vanoggend geëet het” klink dit heeltemal anders as wanneer produsente-organisasies dit sê.

G’n wonder dat dié woorde van mnr. Nhlanhla Nene by die jaarlikse FarmBiz-konferensie oor landboubesigheid in Afrika die dagblad Beeld se plakkate teen lamppale gehaal het nie.

Nene is dalk ’n vars, nuwe ambassadeur vir Suid-Afrika se landbou.

Hy ken die ANC, hy verstaan die Nasionale Tesourie, en hy weet hoe die Regering werk. Hy word wyd gerespekteer en as ’n etiese persoon beskou. Boonop boer hy self en erken ruiterlik dat