Kleinveepryse skiet op in Suid-Kaap
VEILINGPRYSE vir kleinvee in die Suid-Kaap lyk besonder goed met die veilingseisoen in volle swang.
Dié streek het tot dusver nie die effekte van die knellende droogte ervaar nie. Met die gunstige klimaat is daar ’n duidelik opwaartse kurwe vanjaar, sê mnr. Appie Maritz, bestuurder van BKB se vee-afdeling.
Volgens Maritz is daar veral ’n neiging vir goeie pryse by wolskape omdat die goeie wolprys ’n aansporing vir kopers is.
“Pryse vir die kleinveebedryf se produkte lyk baie goed. Die wolprys is tans op sy beste vlak in jare – al het die sterker rand dit onlangs geknou. Vleispryse lyk ook nou besonder goed.”
Maritz verduidelik daar is veral ’n klemverskuiwing na goeie wolkenmerke, veral wat lengte en gehalte betref. Dit is veral by ramme ’n prysbepalende faktor.
Hy sê die pryse in die res van Suid-Afrika lyk redelik stabiel teenoor verlede jaar. Die droogte plaas ’n demper op veilingpryse en dit klop nie met die goeie wol en vleispryse nie. “Met minder kontant in die hand sal ’n boer nou byvoorbeeld eerder drie ramme as vyf koop.”
Volgens Maritz is daar nog ’n paar veilings wat wél in droogtegeteisterde dele van die WesKaap, soos die Swartland en Karoo, voorlê.
Hy is bekommerd dat pryse en die vraag by dié veilings kan daal, aangesien die boere in die streke nie noodwendig die nodige kontant vir aankope sal hê nie. –
‘Pryse vir die kleinveebedryf se produkte lyk baie goed. Die wolprys is tans op sy beste vlak in jare – al het die sterker rand dit onlangs geknou. Vleispryse lyk ook nou besonder goed.’