SA HOENDERVLEIS KRY WIND VAN VOOR UIT NAMIBIË
MET sake wat net nie vlot vir Suid-Afrikaanse hoenderboere wil verloop nie, kry die pluimveebedryf nou boonop ook wind van voor uit Namibië.
Altesaam ses Suid-Afrikaanse partye se aansoek teen invoerbeperkings in Namibië het misluk ná die Namibiese hooggeregshof in Junie bevind het die aansoek is te laat ingedien.
Die Suid-Afrikaanse pluimveevereniging (SAPV), Astral Foods, Supreme Chicken, Sovereign Foods, Afgri Poultry en Rainbow Farms het ’n aansoek teen die streng invoerbeperkings wat in April 2013 opgestel is, teen Namibië se minister van handel en nywerheid, die regering, die pluimveebedryf en die vleisraad ingedien.
“Voor die kwotas ingestel is, het ons meer as 2 000 ton hoendervleis per maand na Namibië uitgevoer,” verduidelik mnr. Kevin Lovell, die uitvoerende hoof van die SAPV. “Namibië het in daardie stadium nie ’n eie braaihoenderbedryf gehad het nie.”
NUWELINGBELASTING
Die Namibiese regering het in April 2013 invoerkwotas van 600 ton per maand ingestel. Geen permitte vir kitsbevrore hoenderstukke, die grootste invoerproduk uit Suid-Afrika, is toegeken nie.
Dié strenger maatreëls is ingestel ná die ontstaan van die Namibiese Pluimveebedrywe (Namibian Poultry Industries of NPI) in 2012 om die bedryf teen goedkoper invoer, hoofsaaklik uit Suid-Afrika, te beskerm.
Die invoerkwota is in Oktober 2014 tot 900 ton verhoog.
“Weens hierdie invoerkwotas word ons by die stabiele Namibiese hoendermark uitgesluit,” sê Lovell.
Die invoerkwotas is op alle verwerkte produkte wat deur die Namibiese pluimveemaatskappye gelewer word, geplaas, behalwe op vars hoender, wat nie ’n noemenswaardige aandeel in Suid-Afrikaanse uitvoer gehad het nie.
Volgens protokol van die Suider-Afrikaanse Ontwikkelingsgemeenskap (SAOG) mag Namibië wel jong bedrywe beskerm (infant industry protection) met ’n vorm van tariefbeskerming wat oor ’n beperkte tydperk op ’n dalende skaal aangewend word.
Lovell sê egter invoerkwotas is nie deel van dié handelskwotas nie, en Namibië het nie by voorgeskrewe handelsooreenkomste gehou nie.
Hy sê Suid-Afrikaanse pluimveeboere kan hoendervleis teen laer pryse lewer as Namibiërs en die Namibiese bedryf sou in ’n vrye mark nie bestand wees teen goedkoper Suid-Afrikaanse hoender nie.
“Ongelukkig betaal Namibiese verbruikers nou aansienlik meer vir hul hoender. Vir kitsgevriesde gemengde porsies is die prys meer as 50% hoër.”
NAMIBIËRS VEG OM OORLEWING
“Namibië probeer die voortbestaan van sy eie piepklein bedryf verseker, nes Suid-Afrika walgooi teen die magtige Amerika, Brasilië en die Europese Unie,” sê mnr. Koos Ferreira, besturende direkteur van Namibmills, die maatskappy waaruit die NPI aanvanklik ontstaan het.
Die SAPV en die ander aansoekers het in Julie teen die bevinding geappelleer, maar ’n hofdatum is nog nie bekend nie.
–