Winter-oeste lig kop ná droogte
SUID-AFRIKA se verwagte koringoes kan vanjaar aansienlik groter as verlede jaar se skrale 1,44 miljoen ton wees.
Die Nasionale Oesskattingskomitee sê in sy eerste skatting van vanjaar se nasionale oes 1,683 miljoen ton koring word verwag, wat byna 17% meer as verlede jaar s’n sal wees.
Landbouweekblad
Dit is grootliks danksy uitgebreide aanplantings in die Wes-Kaap en die Vrystaat. Die Wes-Kaap se geskatte koringaanplantings is 323 000 ha, wat 13 000 ha meer is as verlede jaar, en die Vrystaat se aanplantings beloop 100 000 ha, wat 20 000 ha meer is.
Die Wes-Kaap se verwagte oes staan op 904 400 ton (54% van die nasionale oes), en die Vrystaat se beraamde produksie is 290 000 ton (17% van die totaal).
Vanjaar se verwagte nasionale oes is nogtans heelwat onder die tienjaargemiddelde van byna 1,85 miljoen ton. Dit sal die der- de kleinste oes van die dekade wees. In 2010 het Suid-Afrikaanse boere net 1,43 miljoen ton koring geoes.
Die verwagte Suid-Afrikaanse kanola-oes is ook heelwat groter as in die droogtegeteisterde 2015. Vanjaar se beraamde 102 000 ton is byna 10% meer as verlede jaar se oes.
Die verwagte moutgars-oes is egter kleiner as die vorige jaar s’n. Die eerste skatting is 271 885 ton, wat 18% minder is as verlede jaar.
SOMERGEWASSE
Die komitee se agtste skatting van somergewas-oeste het nie betekenisvolle veranderings vanaf die vorige raming ’n maand gelede opgelewer nie.
Die geelmielie-oes is effens opwaarts aangepas, met 0,8% tot 4,2 miljoen ton. Dit bring die verwagte kommersiële mielieoes op net onder 7,3 miljoen ton te staan, die kleinste in nege jaar.
Die grondbone-oes is met 9% vanaf die vorige skatting verlaag, die sorghum-oes met 7% en die droëbone-oes met net onder 1%.
Die witmielie-, sonneblomsaaden sojaboon-produksieskattings is onveranderd gelaat.