Logistiek pootjie graaninvoer
DIE beskikbaarheid van mielies en logistiek is groter bekommernisse as hawekapasiteit, sê mnr. Nico Hawkins, bedryfshoof van die Suid-Afrikaanse Graaninligtingsdiens, oor die meer as 2 miljoen ton mielies wat na verwagting die komende seisoen ingevoer moet word.
Hy het onlangs by die landbousakekamer Agbiz se graansimposium in Centurion gesê Kaapstad, Durban, Port Elizabeth en Richardsbaai het almal genoegsame aflaaiplek vir groot hoeveelhede graan.
“Wat egter ’n bron van kommer is, is die logistieke probleme wat ontstaan wanneer dié kommoditeit van die hawe na die verwerkers versprei moet word.”
Veral die laai van vragmotors is ’n probleem, en hy het al gesien hoe trokke vir kilometers toustaan by die Durbanse hawe om ingevoerde graan weg te ry.
VOEDSELTEKORT
Hy sê Richardsbaai het hierdie seisoen tot dusver goed gevaar, en glo dié hawe sal in die toekoms ’n goeie opsie wees vir graaninvoer as die ander hawens sukkel om betyds graan te versprei.
Suid-Afrika sal heel moontlik ’n miljoen ton wit mielies en net meer as 1,2 miljoen ton geel mielies in die komende seisoen moet invoer, en Hawkins voorsien dat die wêreldwye beskikbaarheid van wit mielies teen vroeg volgende jaar ’n kwessie sal wees.
“Suid-Afrika sal ook sowat 2 miljoen ton koring invoer, wat sy eie kwessies bring. Is ons daartoe in staat om soveel koring in te voer? Beslis. Solank daar geld beskikbaar is om die koring aan te koop, sal daar ’n manier gevind word om hierdie hoeveelheid tonne die land in te bring. Ek voorsien dus nie dat daar ’n voedseltekort teen die einde van die jaar sal wees nie.”