INVOER STREM RCL SE INKOMSTE
DIE krisis waarin die Suid-Afrikaanse pluimveebedryf hom bevind, is duidelik sigbaar in RCL Foods se resultate vir die jaar tot 30 Junie. Met sy hoender- en suikerafdeling ingesluit, het sy inkomste met 6,8% gestyg, maar daarsonder met 13,1%.
Albei dié afdelings is deur die droogte geknou. Die hoenderafdeling is benewens duurder voer ook deur rekordvlakke van invoer benadeel.
Mnr. Robert Field, finansiële direkteur, sê die maatskappy, wie se portefeulje die handelsmerke Rainbow en Farmer Brown insluit, evalueer alle moontlikhede in sy hoendersakemodel.
Hy beweeg reeds al hoe meer weg uit die mark vir “kommoditeitshoender”, oftewel die mark vir kitsbevrore hoenderstukke (IQF), waar daar weens invoer ’n ooraanbod is en waar plaaslike produsente se koste geen rol in die prys speel nie.
Ingevoerde hoender uit veral die Europese Unie land teen ’n lae koste in Suid-Afrika aan. Dit is omdat daardie boere hoenderborsies teen goeie pryse kan verkoop en minder vir uitgevoerde stukke aan die been kan vra. “Suid-Afrikaanse boere wys produksiekoste aan alle dele van ’n hoender toe,” sê Field.
Die ooraanbod benadeel plaaslike produsente se prysgesprekke met kleinhandelaars, wat ’n wye keuse van verskaffers het.
“Dit het ’n regstreekse invloed op die prys wat ons kan kry.”
HOËR WAARDE
RCL Foods werk hard om sy mandjie produkte wat hy lewer aan kliënte in die kitsrestaurantbedryf, soos Nando’s, KFC, Chicken Licken, Starbucks, McDonald’s en Burger King, uit te brei.
Die maatskappy kon die getal hoenders wat die korrekte gewig het, soos deur sulke restaurante vereis word, verhoog. Aangesien die res van die hoender gewoonlik IQF-produkte word, kon hy sy IQF-produksie van 600 ton/ Die maatskappy ondersteun die Regering se instelling van ’n pekelwaterperk. “Dit sal die speelveld gelyk maak. Dit maak nie aan ons soveel saak hoeveel die perk is nie.”
Field sê die beoogde perk sal vir RCL ’n relatiewe voordeel bring omdat sy vlak van toevoeging van sowat 30% laag is vergeleke met ander produsente s’n.
Wat die suikerafdeling betref, sê Field as ’n mens na die geskiedenis kyk, kan dit twee jaar duur voor dié afdeling van die droogte herstel, selfs al reën dit goed in die volgende produksiejaar. Verder is dit ook moeilik om te bepaal wat die invloed van die Regering se beoogde suikerbelasting gaan wees.