Vee en vogbewaring bondgenote in droë weste
Met ’n kombinasie van oorlêlande, vogbewaring, verminderde bewerking, die beste kultivars, vleisbeeste en skape kan dié boerdery selfs die droogste tye oorleef. Die Malherbes is ook die eerste SuidAfrikaners om Brangusteelmateriaal na Amerika uit te voer
Dit was die afgelope tyd só droog dat die Malherbes vir die eerste keer nie kon mielies plant nie, maar toe kom die ander deel van die boerdery – Angus- en Brangusbeeste en SA Vleismerino- en Suffolkskape – tot hul redding. “Ons plant net elke twee jaar op ons lande en boer met goeie bees- en skaaprasse, want dié kombinasie stel ons in staat om suksesvol te boer, sê mnr. Gert Malherbe (58) van die plaas Graslaagte by Hertzogville in die WesVrystaat, waar sy en Suna se seuns, RC en André, ook saam in die boerdery is.
Gert het in 1982 begin boer nadat hy ’n graad in die landbou verwerf het. Hy het eers saam met sy pa, Loffie, geboer.
Sedert 1987 het hy grond gehuur om sy eie boerdery naas dié van sy pa te bedryf. Later het hy begin grond koop. Sy oudste seun, RC, het in 2008 saam met hom begin boer. In 2011 het sy seun André ook ingeval.
Gert glo boere moet by organisasies betrokke wees wat vir volhoubare landbou saak maak, soos Graan SA, Vrystaat Landbou en die Rooivleisprodusente-organisasie. Hy dien tans in Suidwes Landbou se direksie.
RC dien op die Angusraad, waar hy ondervoorsitter is, en André is ’n streekverteenwoordiger van die Vrystaatse Jongboervereniging.
VEE TOT DIE REDDING
1 Normaalweg is mielies die familieboerdery se hoofgewas. Hulle plant 80% wit mielies en 20% geel mielies. Die geel mielies word hoofsaaklik vir hul vee gebruik.
Toe die huidige droogte sowat drie jaar gelede sy tande in Suider-Afrika ingeslaan het, het boere in die weste dit gevoel, want hierdie deel kry minder reën as die oostelike saaigebiede.
Omdat dit te min gereën het, kon hulle ondanks hul ruslandstelsel verlede somer geen kontantgewasse plant nie.
Dit het die rolle laat omruil. Waar die mielies altyd die hoofbron van inkomste is en geel mielies gebruik is om die beeste en skape af te rond, moes die vee hierdie keer die saaiery “subsidieer”.
“’n Sterk veefaktor speel ’n uiters belangrike rol in die oorlewing van saaiboere hier. Daarom boer ons met Angus- en Brangus- PLAASINLIGTING KORTOM
■ In ’n baie droë omgewing moet ’n boer verskillende sterk boerderyvertakkings hê om die risiko’s te versprei. ■ In hierdie boerdery help die saaiery en vee om die beurt mekaar uit die moeilikheid wanneer boerderytoestande swak is. ■ In die saaiery speel ’n oorlêstelsel ’n sleutelrol om vog te bewaar terwyl lande braak lê.