KORING GEPLANT.

Hulle gebruik hoofsaaklik Monsanto en Pannar se saad. Om seker te maak hulle plant slegs kultivars wat goed in hul omgewing aangepas is, bestudeer die Malherbes die resultate van die jaarlikse nasionale kultivarproewe. Dié proewe word deur die Landbounavorsingsraad gedoen, met die samewerking van saadmaatskappye. Die Malherbes evalueer ook die beste presteerders in hul plaasproewe, spesifiek die kultivars wat die beste in die weste presteer. Dan doen hulle plaasproewe om die opbrengs te evalueer voordat hulle die beste kultivars kies om kommersieel op die plaas Graslaagte aan te plant. Die plaasproewe word met die samewerking van Monsanto en Pannar gedoen.

Hul beste planttyd is van 20 November tot 15 Desember. Dit het die afgelope drie jaar baie minder gereën as die langtermyngemiddelde en vanjaar kon hulle nie mielies of sonneblomme plant nie. ■ Toe ’n landsreën in Maart begin val, was dit te laat vir mielies en sonneblomme. Hulle het die afgelope paar jaar nie koring geplant nie omdat die winsgewendheid laag is. Toe die grond in April 10% nat was, het hulle egter koring geplant op lande wat toe al vir twee jaar oorgelê het.

Hulle het ook hawer en Japannese radyse vir beweiding geplant. Hulle verbou gewoonlik hierdie gewasse, maar dié keer het hulle twee keer die gebruiklike oppervlakte geplant omdat die veld uiters skraps was en hulle nie mielielande vir weiding gehad het nie.

Die hoeveelheid voer wat die hawer verskaf, is van die grootste tot nóg toe. “Die winterreën het ons dus gered,” vertel RC.

Hulle het voorsorg getref in geval die droogte nóg langer aanhou deur mieliereste by besproeiingsboere op Bloemhof te koop. Hy het uiteindelik sowat 3 000 ronde bale aangery, asook gebaalde koringstrooi. Dit kom nou goed te pas in die beesvoerkraal, waar hulle hul eie speenkalwers en