Skoolbanke toe vir Noord-Kaap se onnies in landbouwetenskap

ONGEVEER 50 landbou-onderwysers in die Noord-Kaap het ’n deel van hul Julievakansie opgeoffer vir opleiding in landbouwetenskap.

Die opleiding is deur die Landbounavorsingsraad (LNR) aangebied en het veral oor die nuwe kurrikulum en asseseringbeleidsverklaring (CAPS) gehandel. Dit is deel van die Noord-Kaapse departement van onderwys (NKOD) se plan om onderrig in die provinsie te verbeter.

“Die doel van die opleiding is om die kwalifikasie en professionele bevoegdhede van landbou-onderwysers te verbeter en om die kennis en vaardighede vir CAPS te voorsien,” sê me. Mpho Makhanya van die LNR. “Die op-

leiding sal help om moeilike vakinhoud per graad te verduidelik en om die agterstand van sommige onderwysers en vakraadgewers uit die weg te ruim.”

Volgens Makhanya was die opleiding ’n samestelling van teorie en praktiese opleiding. Dit is gegrond op die evaluering van die diagnostiese resultate van verlede jaar se uitslae in landbouwetenskap vir graad 12.

Onderwysers van die distrikte John Taolo Gaetsewe, Namaqua, Francis Baard, Pixly ka Seme en Siyande in die Noord-Kaap wat deur hul vakraadgewers benoem is, het die opleiding ontvang.

Mnr. E.P. Nel, voorsitter van die Suid-Afrikaanse Landbou-onderwysersvereniging, sê daar is ’n tekort aan opleiding vir landbou-leerkragte, want slegs die Universiteit van die Vrystaat bied landboumetodiek as vak aan toekomstige landbou-onderwysers aan. –