SKAAPVLEIS IN OPWAARTSE TRAJEK
OP ’n jaargrondslag was die prys van skaapvleis teen einde Augustus sowat 10,7% hoër as die ooreenstemmende maand verlede jaar. Klas A2/A3 het R62,46/kg behaal, terwyl klas C2/C3 gemiddeld R48,63/kg behaal het.
Mnr. Gerhard Schutte, hoofbestuurder van die Rooivleisprodusenteorganisasie, meen die opwaartse neiging in pryse sal voortduur. “Die goeie vraag en hoë pryse wat Australiese lams en skaapvleis op die internasionale mark behaal, ondersteun binnelandse pryse. Die swakker rand (ná die jongste debakel ten opsigte van mnr. Pravin Gordhan, die Minister van Finansies, en die Valke) maak dit nie net duurder om vleis in te voer nie, maar skep ook uitvoergeleenthede vir skaapvleis soortgelyk aan wat reeds met beesvleis die geval is.”
’n Opname deur die Universiteit van die Vrystaat het getoon dat sowat 15% vroulike diere van die skaapbevolking weens die nadraai van die El Niñoverskynsel reeds uit die stelsel verwyder is.
“Die laer aanbod, asook boere wat weer hul kuddes kan opbou, sal druk op die aanbod plaas en pryse ondersteun.”
Schutte sê egter dat die groter invoer van skaapvleis uit Namibië weens die opheffing van sekere protokolle in ’n mate ’n demper op verdere prysstygings kan plaas, maar dat dit gesien moet word as die verloop van normale markkragte.
– THEUNS BOTHA